Nanook saqqummersitsinermini NanuBørn tapersersorpaa

Saqqummersitaq "Ilissinnut" erinarsuutinik 19-inik imaqarpoq. Saqqummersitaq erinarsortartoqatigiit siorna ukiunik qulinngortorsiornerminni tusarnaartitsinerani immiussaavoq.

Saqqummersitamit "Ilissinnut"-mit isertitat pingajorarterutaat tapersersuinertut tunniunneqassapput.

NanuBørn ukiup massuma naajartulernerani taperneqarnissaminik naatsorsuuteqartariaqarpoq.

- Saqqummersitarput pisiarigaanni, taava pitsaasumik suliniuteqartut aamma tapersersorneqassapput, Nanook tusagassiutinut nalunaaruteqarluni allappoq.

Nanook siullermiilinngilaq tapersersuilluni. Katersuiniussinerni, soorlu Neriuffimmut, tapiilluni tusarnaartitsisarsimavoq.

”Ilissinnut” 19-inik nipilersukkanik imaqarpoq, siornalu ukiut qulinngortorsiornermi tusarnaartitsinermi immiussaalluni.

- Nipilersukkat rockerpalaarnerupput. Immiussallu nipaasa suliarineri sakkortunerusutut ittumik, Hans Peter Anthonsenimit (PukuuT-ni nipilersortartoq) suliarineqarput. Taanna avannaaniit nipilerisimavoq, tusagassiutinut nalunaarutigineqarpoq.

Inuk namminiusoq silallu pissusiata allanngoriartornera

Nanook inuup namminiusup, kultoorimillu imaqartumik taallaqartarnermigut ilisarineqarsinnaavoq.

Aammali silap pissusiata allanngoriartorneranik, nannullu aarlerinartorsiornerulerneranik imaqartumik suliaqarsimalluni.

Saqqummersitaq ”Ilissinnut” saqqummersitat sisamaraat.

Nanook nunatsinni erinarsortartoqatigiinni siullerpaalluni Japanimi 2016-imi saqqummersitsivoq.

Saqqummersitaq kingulleq nunatsinni Pisiffinni Pilersuisunilu pisiarineqarsinnaalerpoq, Nuummilu sapaatit akunnerni kingullerni marlunni pisiarineqarsinnaalereersimalluni.

Saqqummersitami erinarsukkat ilaat "Nanook" tusaruk imaluunniit aliannaarfigiuk:

Powered by Labrador CMS