Nanook paquginnittarnermik atorunnaarsitserusuttoq: Oqaloqatigiissutigineqartarnissaa ilinniassavarput

Nanookikkormiut Paarisa aamma Majoriaq Tasiilaq suleqatigalugit nutaamik musikvideoliorsimapput, tassani nunami maani imminnut toquttarnerpassuit qitiutinneqarlutik. Erinarsuut nipilersortartoqatigiit nuusiarsuata nutaap saqqummiunneqaqqamersup ilaaniippoq.

Qatanngutigiit Elsnerikkut erinarsuusiaminni nutaami imminut toquttarnerup paqumigineqartarnera iliuuseqarfiginiarsarivaat aamma meeqqat inuusuttullu inuunerminni ilungersunartorsiortut qaamanerusumik atugaqalersinniarsarivaat.

Erinarsuut pillugu

Suliniut aningaasaateqarfimmit Sermimit aamma Icecap Exploremit aningaasaliiffigineqarsimavoq, aamma Paarisa (Tusaannga) Majoriaq Tasiilarlu suleqatigalugit suliarineqarsimalluni.

Nipilersuut Atlantic Musicip ataaniittumi Atlantic Studiomi Savalimmiuneersumit Theodor Kapnasimit immiunneqarsimavoq. Musikvideoliaq Bolt Lamarimit suliarineqarsimavoq, Naleraq Ligthsilu qaammaqqusersuisuumalluni.

Christian Elsner ip oqaluttuaraa, erinarsuut nammineq inummut attuumassuteqartupilussuusoq, piffissamilu sivisuumi suliarineqarsimasoq.

- Imminut toquttoqartarnera arlaleriarlunga misigisarsimavara. Nanortalimmi meeraaninni, inuusuttuuninni maannalu inersimasunngorninni ikinngutigilluakkakka annaasarsimavakka.

Tasiilamukarnermi nunami maani sammineqartartut ajornerpaartaasa ilaat allaaserissallugu isumassarsiarineqarsimavoq.

- Nunami sumiiffinnut assigiinngitsunut angalalluta tusarnaartitsisarpugut, aamma meeqqat inuusuttullu workshoppertittarsimavagut. Inuusuttut imminut toquttoqarsimatillugu misilittakkaminnik aliasuutiminnullu oqaluttuaraangata sakkortuumik misinnartarpoq.

Aliasuuteqarneq pillugu oqaloqatigiissinnaaneq ilinniarneqartariaqartoq

Christian aamma Frederik Tasiilamukartut

Sumiiffinnili tamani tamanna oqaluuserineqarneq ajorpoq, tamannarpiaavorlu ajornartorsiutit ilagingaat, Christian Elsner oqarpoq. Taassuma oqaluttuaraa, nipilersortartoqatigiit sumiiffinnut imminut toquttoqarsimatsiarnerani arlaleriarlutik tikittarsimasut.

- Inersimasut piumaffigisarpaatigut tamanna oqaluuserissanngikkipput, inuusuttunut allanut "tunillaasinnaanera" annilaagangigamikku. Oqaluuserineqaqquneqanngippat iliuuseqarfigiuminaassinnaavoq. Paqumigineqartillugu oqaluuserineqarnissaa ikiortissarsiornissarlu ilikkarneqarnavianngillat. Tamanna allanngortikkusupparput. Paqumigineqartussaanngilaq. Paqumigineqartuartillugumi nikinnavianngilagut.

Nanookikkut erinarsuut nutaaq aqqutigalugu aamma oqaluttuarerusuppaat, inuunermi artorsaateqartarneq inuuneq naallugu atuunneq ajortoq. Neriuutissaqartuaannart oqaatigalugu.

- Unammilligassaqartarneq inuunermut ilaavoq, inuttullu nukittorsaataasarluni. Tamanna takujuminaallunilu upperiuminaassinnaavoq, neriuuteqartuartariaqarpormi aamma piffinni artorsarfiusuni nammineq inuuneq tatigineqartariaqarpoq, Christian Elsner oqarpoq.

Aaqqiissutissatut toqqarneqanngisaannassasoq

Erinarsuummi aamma oqaluttuarineqarpoq, inuk inuunerminik kipisiniarluni imminut toqukkaagat qanigisaasunut alianartorujussuusartoq.

- Inuusuttutut imminut toqunnerup kingunerluuteqartarnera qanorlu amerlatigisunut sunniuteqartarnera paasissallugu pingaaruteqarpoq. Artorsaatinut aniguiffissatut isigineqanngisaannartussaangaluarpoq.

Christian aamma Frederik oqarput, nipilersortartoqatigiit nipilersortartutut inuusuttunut attaveqartartut tamatumunngalu peqatigitillugu inuusuttorpassuarnit nuannaartorineqartutut iliuuseqarnissamut akisussaaffeqartarlutik.

- Nalunngilarput ajornartorsiut kisitta aaqqiiffigisinnaanagu, periarfissaqartillutali iliuuseqarusuttarpugut.

Nanookikkut nunami maani tullissaanik tusarnaartitsisaqattaarnerminni sumiiffinni tamani sivisunerusumik najuuttarniarput, meeqqat inuusuttullu workshoppertittarlugit allanillu aaqqissuussisarlutik.

Powered by Labrador CMS