Nannut pillugit suleqatigiinneq taamaatinneqartoq

Amerikamiut kattuffiat U.S. Fish and Wildlife Service, ilaatigut pinngortitaq pillugu inatsisinik atortitsisup, kattuffimmik nunap inoqqaavinik sinniisuusumik suleqateqarnini taamaatippaa.

Taakku suleqatigiit marluk ukiuni arlalinni Chukchi Seami Alaskap Ruslandillu akornanni imartami nannuttassat killilerneqarnissaannut isumaqatigiinniarsarisarput.

Nannut ukiumut piniarneqartartut pisortatigoortumik malittarisassaqartinneqanngillat, kisianni U.S. Fish and Wildlife Servicep 2017-ip aallartinnerani pisassiissutinik takkuttoqarnissaa siornatigut nalunaarutiginikuuaa.

Isumaqatiginninniaqatissamik nutaamik ujaasisoq
U.S. Fish and Wildlife Servicep Alaska Nanuuq Commission (ANC) suleqatigalugu pisassiissutit amerlassusissaat isumaqatigiissutiginiarsarigaluarpaat. Tamannalu iluatsissimanngilaq.

- Anguniakkat anguniarlugit suleqatiginnikkumasunik maanna ujaarlerpugut, U.S. Fish and Wildlife Servicep paasissutissiinerani tamanna allaqqavoq.

Ukiumut pisat killeqartinneqartarnissaannut Alaska Nanuuq Commission akuersaarpoq, kisianni nunap immikkoortuini isumaqatigiissuteqarsinnaasimanngilaq.

Atuaruk: 2016-imut nannunik pisassiissutit 140-t

- Misiliineq asseqanngilaq, Alaskami nunap inoqqaavisa nannuttassaat killeqartinneqarnikuunngisaannarmata. Kisianni ANC-p nassuerutigaa, nannut peqqissusaannut siunissaannullu tunngatillugu ukiumut pisassiissuteqartalernissamik ineriartortitsineq piujuaannartitsinissamut periusissamut pingaaruteqartuuvoq, Alaska Nanuuq Commission nittartakkamini oqariartuuteqarpoq.