Skip to main content

Nannut pillugit ilisimatusartoq 1 million koruuninnattoq

Pinngortitaleriffimmi aamma USA-mi University of Washingtonimi ilisimatusartuuneq, Kristin Laidre, ukiuni pingasuni atugassatut naatsorsuussanik 1 mio kr.-inik aningaasartalimmik USA-mi PEW Marine Fellowshipimit stipendiatimik tunineqarpoq.

Aningaasaliissutit Kristin Laidrep ilisimatusaatigalugu suliaminut marlunnut, tassalu nannut Issittumi tamarmi qanoq issusiannik misissuinissaminut aappaattullu, Kalaallit Nunaanni sumiiffinni nanoqarfiusuni piniartut nannunniartartut inuunerat pillugu assiliartalersorlugu allaaserinninnissaminut atorniarpai, Pinngortitaleriffimmit tusagassiuutinut nalunaarummi tamanna atuarneqarsinnaavoq.

Piniartut pillugit assiliartalimmik allaaserisani atorlugu ilimatusartartut sulinerminni piniartunik nannunniartartunik suleqateqarnerisa pingaaruteqassusiat attatiinnarneqarnissaallu ersersikkusuppaa.

Kristin Laidrep suleqataasalu suliaq Tunumi inoqarfinni Kalaallit Nunaata sinnerani inoqarfinnut allanut sanilliullutik nannunit qaninngoorneqarnerusartuni aallartissavaat.

- Piniartunik apersuinissanni suleqatigissavakka assiliisartoq Finlandimiu Tiina Itkonen aamma amerikamiu allaaserinnittartoq Susan McGrath. Apersuinitsinni soorunami kalaallimik tuluttuumiit kalaallisuumut nutserisinnaasumik oqalutseqassaagut, taanna oqarpoq.

- Illoqarfinni nunaqarfinnilu piniartut ilaqutaallu inuuniarnerminnut pingaarutilimmik nannunniartartut tikeraassavagut. Silap pissusiata allanngoriartornerata piniartukkormiut inuuniarnerannut avatangiisaannullu qanoq sunniuteqarnera piniartunut oqaluttuaritikkusupparput. Piniartunik apersuilluni allaaserisat assilisallu Kalaallit Nunaanni, USA-mi Finlandimilu tamanut saqqummersinneqarnissaat, suliniutillu aappaata - nannut Issittumi tamarmi qanoq issusiannik misissuinerup inernerata atuagassiani ilisimatuussutsimik sammisaqartuni saqqummersinneqarnissaa siunertaavoq, Kristin Laidre oqarpoq.

Tasiilami nunaqarfittaanilu piniartunik apersuillunilu assileeqattaarnerit qaammammi uani aallartissapput. Tamatuma kingorna Kristin Laidrep suleqataasalu Qaanaaq Ittoqqortoormiit taakkualu nunaqarfii aamma tikinniassamaarpaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER