Nannut Nuup qanittuani takuneqarsimasut
Paornánguaq Johnsen Jessen uinilu Nuup eqqaani illuaqqaminiitillutik sapaatiummat ullaakkut iteramik tupassimaqaat, nannummi marluk aappariit illuaraata silatani eqqissisimaarujoorsimapput.
Ilaqutariit sapaatip akunnerata naanerani Nuup eqqaani silagissuarmi illuaqqaminiillutik, sapaatiummat ullaakkut iteramik tupassimapput.
-Kisimiilluta illuaqqami sapaatip akunnera naanersiorparput. Sapaatiummat ullaakkut uinga makikkami oqariasaarpoq: qivi qakku!
Tuaviinnaq igalaamukarpunga, illuaqqamiillu 100 meterisut ungasitsigisumi nannut marluk sissami issiapput, Paornánguaq Johnsen Jessen Sermitssiaq.AG-mut oqaluttuarpoq.
Illuaraq Nuup kujataani Nuup Narsaata eqqaani Aakkaaniippoq.
- Ullaq aatsaat taamak kusanartigisutut misigivara, taanna oqaluttuarpoq.
Illuaqqamut iseqqipallattariaqarsimasut
Misigisarli pissanganartortaqarpoq. Nannut nikueriarlutik illuaqqap eqqaani illuaqqap allap tungaanukarsimapput. Paornánguaq Johnsen Jessenip ilaqutariit nerisassaat illuaqqamut eqqutipallassimavai, nannut narajorunnaarniassammata.
Aamma silamukarluni ernerminut sianerniarluni telefonip signalia nassaariniarsimagaluarpaa. Taamaaliorsinnaasimanngilarli.
- Uimma suaartarfigeriasaarpaanga: Aggerput. Iserit. Uinga piniartuuvoq, nalunngilaalu anaanaq piaralik pisarineqaqqusaanngitsoq. Sikuå tungaanut ingerlariarlutik qaqqamut tarrinnissaasa tungaanut isiginnaaginnarpavut. Kusanarluinnarput, Paornánguaq Johnsen Jessen oqarpoq.
Qanillinaveersaarneqassasut
Misigisaq Facebookikkut Nuummi innuttaasunut paasissutissiisarfimmi takutinneqarsimavoq, WWF-imilli erseqqissaassutigineqarpoq, nannut isiginnaarlugit soqutiginartaraluartut akornuserneqaqqusaanngitsut.
- Takugaanni qanillinaveersaarneqartusaapput, sumiiffimmiillu qimagulluni, Kalaallit Nunaanni WWF-imi suliniutinut ataqatigiissaarisoq Kaare Winther Hansen Sermitsiaq.AG-mut oqarpoq.
Nannut illersorneqarsinnaasumik isiginnaarneqarsinnaappat?
- Akornuserniarnagit ersiortinniarnagillu qanillinaveersaarneqartussaapput. Meterinik hunnorujulikkaanik ungasitsigisumiissapput. Nannut isiginnaarniaraann qinnguserluni pitsaanerpaavoq, Kaare Winther Hansen oqarpoq.
Taassuma oqaatigaa, nannut marluugaangata anaanaq piararlu amerlasuutigut pineqartartut. Marluullutimmi ingerlaannavianngimmata. Anaanaq piaralik eqqissisimatitaavoq, ulorianartorsiortitsippallu aatsaat pisarineqarsinnaalluni.
Paornánguaq Johnsen Jessenip nannut pillugi videoliaa uani takuuk:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...