Nannut immikkuullarissut eqqissisimaarfiat: Issittup kunngia nalimmassarpoq
Silap pissusiata allanngoriartorneranut takussutissaq – nanoq – kissatsikkiartornera piniarsinaanneranut periarfissaanut akornusiivoq. Nannulli uumaannarnissaanut sunniuteqartorujussuit pissusilersuutit sananeqaatillu nannuni amerlanngitsuni Kalaallit Nunaannittuni takussutissaqartoq paasineqarpoq.
Nannut 200-t missaannaaniittut immikkuullarissut silap pissusiata allanngoriartorneranut nalimmassarsinnaanerinut takutitsigunarput.
Iliuuseqarnissarli pisariaqarpoq. Aviisi AG taama allappoq.
Nannut pillugit ilisimatusartut ilisimaneqarluartut – soraarninngornerit - Erik W. Bornip aamma Øystein Wiigillu Tunumi nannut misissuiffiginerini paasivaat nannunut ataatsimoortunut aalajangersimasunut pinngortitami eqqissisimatitsivimmik pilersitsinikkut aaqqiissuteqartoqarsinnaasoq.
Nannut taakkorpiaat piujuaannartinneqarnissaat sooq pingaaruteqarnersoq AG-p apeqqutigaa.
- Pingaaruteqarluinnarput. Taakku nannut ataatsimoortut sananeqaatimikkut nannunut allanut sanilliullugit immikkuullarissuteqarput, Erik W. Born oqarpoq.
Nannut pineqartut Tasiilap Ikerasassuullu akornanniittumi sumiiffimmi aalajangersimasumi uumasinnaanertik takutikkaat taassuma naqissuserpaa. Sumiiffimmi sila allanngorartuuvoq, kialluni sikukilluni, tassanilu nannut taakku uumaniarsinnaallutik.
Atugassat taakku allanngorartut – silap pissusiata allanngoriartorneranit pilersitat – Issittup sinneranut sumiiffinnut nanoqarfiusunut siammaraluttuinnassapput (taamaalereerlunilu), Erik W. Born erseqqissaavoq.
- Tunumi nannut taakkua amerlanngitsut sananeqaataat siunissamut illersorneqartaraiqarput, nannut aniguinissaannut isumalerujussuummata. Taakkumi uummasut pineqartut sananeqaatimikkut pissusilersuutimikkullu silamut kiannerusumut sikukinnerusumullu nalimmassarsimammata, itisiliivoq.
Aviisimi AG-mi atuarnerusinnaavutit. Aviisi uani pissarsiariuk:
