Nannut ajornartorsiutaasut pillugit maleruagassaqarneranik naalakkersuisoqarfik eqqaasitsivoq
Nanoq pinngortitami tassanngaannaq takkutissagaluarpat kinaluunniit imminut illersorsinnaatitaavoq.
Sapaatip-akunnerata naanerani kingullermi ilaqutariit nunaqarfiup Niaqornat eqqaaniitillugit nanoq ilaqutariinnut qanillimmat toqunneqartariaqarsimavoq.
Politiit naapertorlugit, nanoq qimaatinneqarsinnaasimanngimmat toqunneqarsimavoq.
Aalisarnermut Piniarnermullu Naalakkersuisoqarfimmit sapaatip-akunnerani matumani tusagassiorfitsigut nalunaaruteqarluni ilisimatitsissutigineqarpoq, nannunik ajornartorsiutaasunik naapitsinermi maleruagassaqartoq.
- Nannunik ajornartorsiutaasunik periutsit assigiinngitsut atorlugit qimaatitsisoqarsinnaavoq, tamannalu amerlanertigut iluatsittarpoq. Periarfissaq kingullerpaaq atorlugu qimaatitsiniarnerlu iluatsinngikkaangat allatut ajornartumik nannunik ajornartorsiutaasunik toqutsisoqartariaqartarpoq, naalakkersuisoqarfimmit ilaatigut allapput.
Nannunik ajornartorsiutaasunik toqutsisoqarsimatillugu nannup neqaa sumiiffimmi agguaanneqartarpoq:
- Nannup neqaata sivisuumik uunneqarnissaa pillugu ilitsersuutit Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmit, UNIO-mit pissarsiarineqarsinnaapput. Nannup amia, kukii niaqualu Naalakkersuisoqarfimmut nassiunneqartarput, ilanngullugu allapput.
Kinaluunniit imminut illersorsinnaatitaasoq
Erseqqissaassutigineqarpoq, pinngortitami nannumik naapitsinermi kinaluunniit imminut illersorsinnaatitaasoq:
- Pinngortitami nannut tassanngaannaq takkussinnaasarput, tamannali qaqutigoortuuvoq. Taama pisoqartillugu kinaluunniit imminut illersorsinnaanissamut periarfissaqarpoq, imminut illersorniarluni nanoq toqunneqartariaqassappat, naalakkersuisoqarfimmit allapput.
Sermitsiaq.AG-mit Niaqornat eqqaani nanoq toqunneqarsimasoq pillugu Alisarnermut Piniarnermullu Naalakkersuisoqarfimmiut oqaaseqartinniarneqarput, tamannali suli iluatsinneqanngilaq.