Nannut ajornartorsiutaasut akuersissuteqaqqaarnani toqunneqarsinnaalersut
Aalisarnermut piniarnermullu naalakkersuisoqarfiup nannut ajornartorsiutaasut pillugit malittarisassat pisariinnerulersippai, nannut inoqarfiusunut qanillattortut qimaatikkuminaappata, toqunneqarsinnaanerat ajornannginnerulersillugu.
Nannut inoqarfinnut qanillattortut qimaatikkuminaappata, piniarnermut aalisarnermullu naalakkersuisoqarfimmut akuersissummik piniaqqaanngikkaluarluni toqunneqarsinnaalerput.
Nannulli inoqarfinnit qimaatinneqarsimatillugit naalakkersuisoqarfik tamatigut suli ilisimatinneqartassaaq.
Piniarnermut aalisarnermullu naalakkersuisoqarfik tusagassiorfinnut taama nalunaaruteqarpoq, ilisimatitsissutigalugulu nannunik piniarneq illersuinerlu pillugit nalunaarut nutarterneqarsimasoq.
- Nanoq ajornartorsiutaasutut nalilerneqartoq inuussutissarsiutigalugu piniartumit atuuttumik akuersissutilimmit toqunneqarsinnaappat nannuttup pigiinnassavaa, naalakkersuisoqarfik allappoq.
Nannut arnavissat piaqqisartut suli toqunneqartassanngitsut, qimaatinniarneqartassasulli, ilisimatitsissutigineqarpoq.
Piniartut ilisimasaat aalajangiinernut ilaatinneqassasut
Inoqarfiit eqqaanni nannut ajornartorsiutaasarnerat ukiuni kingullerni nalunaarutigineqartarpoq. Nanoq qimaatinneqarsinnaanngikkaangat naalakkersuisoqarfimmut akuersissummik piniaqqaarluni nanoq toqunneqarsinnaasarpoq. Tamannali ilaatigut pisinnaasanngilaq nannup toqunnginnerani.
Nannunik piniarneq illersuinerlu pillugit nalunaarusiaq nutaaq Naalakkersuisut 6. marts akuersissutigaat, nalunaarullu marlunngornermi 7. marts atuutilerpoq.
Nalunaarusiami ilanngunneqarpoq nannuttassiissutit pillugit piniartut ilisimasaat nalilersuinermi ilanngunneqartalissasut, takornarianullu piniartitsinngikkaluarluni takornariartitsisarnerit akuersissutaatilinnut ammarneqarluni.
Nalunaarusiaq malunnaatilimmik allanngortinneqarmat, aalisarnermut piniarnermullu naalakkersuisup Karl Tobiassenip (S) nuannaarutigaa.
- Nalunaarummi nutaami piniartut ilisimasaat ilanngunneqarnerat ajunngilluinnarpoq, Naalak-kersuisut taamaalillutik ukiumoortumik nannuttassiissutinik aalajangiisarnerini tamanna aam-ma isiginiassavaat, aalisarnermut piniarnermullu naalakkersuisoq Karl Tobiassen oqarpoq.
Tunup Kujataani nanoqatigiit nutaat siorna nassaarineqartut eqqissisimatitaassasut, Naalakkersuisut aamma aalajangerput.
