Nannunniartartut tapiiffigineqartarnissartik naatsorsuutigisinnaavaat

Piniartut nannussimasut, nannuttamik amiinik qapiartitsinermut aningaasartuutimik affaannik akiliunneqarsinnaanngussapput

Tamanna Jens Npaattuup Partii Naleqqameersup aalajangiiffigisassatut siunnersuutaanut Naalakkersuisut akissuteqaataanni takuneqarsinnaavoq.

Jens Napaattuup siunnersuuteqarnermini tunngavilersuutigaa, nunat tamalaat nannut amiinik piniartut niueruteqarsinnaanerannut inerteqquteqartut, piniartut tamaalillutik nannut amiinik tunisisinnaanermut periarfissaarunnerannut taarsiissutitut tapiissuteqartoqartassasoq.

Nannut amii pillugit paasissutissat

2008-miit 2018-imut nannuttassiissutit 130-niit 156-inut nikerarsimapput.

Agguaqatigiissillugu ukiumut pisassiissutinit 94 %-it missaat pisarineqartarsimapput.

Kalaallit Nunaata Ammerivia A/S paasissutissiivoq, nannut pisarineqartut 15 %-iisa missaat qapiarlugit suliarineqartartut.

Pissarsiffik: Jess Svane, Inuussutissarsiornermut Naalakkersuisoq

Jess Svane siunnersuutip Inatsisartuni siullermeerlugu suliarineqarnissaa sioqqullugu akissuteqaammini allappoq, Inuussutissarsiutigalugu piniartunut atugassarititaasunut killissaliussanik pitsaasunik pilersitsinissaq pingaaruteqartoq.

Aningaasaqarneq unammillernartoq

Kalaallit Nunaata Ammerivia ukiorpassuarni aningaasaqarnermigut unammilligassaqartaraluartoq aamma Namminersorlutik Oqartussat immikkut aningaasaliissuteqartaraluartut, ingerlatseqatigiiffiup aningaasaliissutinut killiliussat iluanni aningaasaqarneq aqussinnaasarsimavaa.

- Nannut amiisa qapiarlugit suliarineqarnerinut akigititap 50 %-anik tunisinermut tapiissuteqartoqartarnissaa Inatsisartut kissaatigissappassuk, ammit qapiagassatut nassiunneqartartut amerlissasut naatsorsuutigineqassaaq. Taamaattumik pisariaqartitsisoqassaaq aningaasaliissutinik aningaasartuutinut matussutaasinnaasunik, aaqqissuussineq kinguneqassappat ammit qapiartinneqartartut amerleriarnerannik, oplyser Jess Svane ilisimatitsivoq, nangillunilu:

Killilimmik aningaasartuuteqartarneq

- Taamaattoq qanoq pisoqaraluarpalluunniit siunnersuut aningaasaqarnikkut killiliussat killeqartut iluanni piviusunngortinneqartussaassaaq, aammalu Inatsisartut tamanna kissaatigissappassuk, tamatuma aningaasanut inatsimmut allannguutissatut siunnersuutitut ilanngunnissaa Naalakkersuisut piareersimaffigaat.

Siunnersuut tallimanngorpat oktobarip 18-ani Inatsisartuni suliarineqassaaq.

Powered by Labrador CMS