Nannunik qimaatitsiniarneq politiinut unnerluutiginninnermik nassataqarsimasoq
Nanoq taasumalu piarai Qeqertarsuatsiaanut qanillivallaarmata Kalaallit Nunaanni Politiinut nannunik illersuinissamut malitarisassanik unioqqutitsisoqarnerarlugu nalunaarutiginnittoqarsimavoq. KANUAANA-milli oqaatigineqarpoq malittarisassanik unioqqutitsisoqarsimanngitsoq.
Nanoq taassumalu piarai marluk septembarip qaammataata qiteqqunnerani nunaqarfimmut Qeqertarsuatsiaanut qanillivallaarmata uivertoqangaatsiarpoq.
Inuit attaveqaqatigiittarfiisisut nannut pillugit videoliat arlallit isiginnaarneqarsinnaasimapput, taakkunanilu takuneqarsinnaavoq inuit arlallit uumasunik takuniaallutik tikiussorsimasut. Allaat takornariartitsisartoq Nuummeersoq nunaqarfimmut nannunik takusassarsiortitsipallassimalluni.
Tamatuma malitsigisaanik nannut illersorneqarnissaat pillugu malittarisassat oqaluuserineqangaatsiarsimapput. Malittarisassat malillugit nannunik takuniaaneq malersuinerlu inerteqqutaapput, tassa piniarnermut atatillugut imaluunniit nannup najugaqarfimmut qanillivallaarsimasup qimaatinniarneranut atatillugu tamanna pisimanngippat.
Umiatsiaq nanup piaraanut qanillivallaarsimasoq
Aalajangersimasumik pisoqarmat innuttaasoq ataaseq malittarisassat unioqqutinnerarlugit politiinut nalunaaruteqarsimavoq.
Videomi ataatsimi Sermitsiaq.AG-mit takuneqarsimasumi, takuneqarsinnaavoq umiatsiaq ataaseq nanoq taassumalu piaraasa imaani nalunneranni miiterialunnguanik ungasitsigisumut pisimasoq.
Tamatuma kinguneranik piaqqap appaa umiatsiap tungaanut sangusimavoq, taamalu anaanaminit piaqqallu aappaanit avissaarluni.
Taamatut pisoqarmat innuttaasoq ataaseq nannut illersugaanerannut malittarisassanik unioqqutitsisoqarnerarlugu politiinut unnerluutiginnissimavoq.
Kinguneqartinneqassanngitsoq
Unnerluutiginninnerli kinguneqartinneqassanngilaq. Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA) naliliimmat nannut najugaqarfimmit qimaatinniarneqarnerannut atatillugu tamanna pisimasoq.
Tamanna takuneqarsinnaavoq allagaatini Sermitsiaq.AG-p Kalaallit Nunaanni Politiinit pissarsiarisimasaani.
Allagaatini aamma nannut Qeqertarsuatsiaat eqqaanut pimmata tamatumalu kingorna septembarip 18-ani aallaallugit toqunneqarmata qanoq pisoqarsimanera paasisaqarfigineqarsinnaavoq.
Nannut septembarip 14-iani takuneqaqqaarmatali arlaleriarluni qimaatinniarneqartarsimagaluarlutik nunaqarfimmut utertuarsimapput innuttaasullu peqqumaataannik nerisaqartarsimallutik.
Arlaleriarluni kalerrisaarlugit seqqortoqartareersoq toqunneqartut
Kommunefogedi taamaammat septembarip 18-iani ullaakkut nal. 07:22 politiinut sianersimavoq, nannunik toqutsinissamut akuersissummik piniarluni.
Kommunefogedi Aalisarnermut, Piniarnermut Nunalerinermullu Naalakkersuisoqarfimmut innersuunneqarsimavoq, nannunik aallaannilluni toqutsinissamut taakku aalajangiisuusarmata.
Politiit ulloq unnuarlu nalunaarusiaminni allassimapput, kommunefogedi nal. 07:26 ilisimatitsisimasoq, aallaat sakkortooq atorlugu nannut qimaatinniarlugit seqqortaartarsimalluni iluatsitsiffiunngitsumik. Tulliullugu kommunefogedip ilisimatitsissutigaa nannut ikilerneqarsimasut.
Nal. 07:42 kommunefogedi ilisimatitsivoq, nannut naalakkersuisoqarfik isumasioreerlugu toqunneqasimasut.