Nanani tamalaani katersugaasiviit ullorititaat Nuummi malunnartinneqassaaq

Ulloq 18. maaji ICOM-ip katersugaasivinnut ulloritippaa.

Najukkami katersugaasiviit nutaajusumik pingaarutaat ukioq manna sammineqarpoq.

Nuummi katersugaasivik tusagassiutinut nalunaarummi allappoq.

Katersugaasiviit amerlanerit uninngaannartuujunnaarsimapput, isiginnaartulli peqatigilluinnarlugit sammisaqartalernikuullutik. Ukioq manna Nuummi Eqqumiitsulianik Saqqummersitsivik ulloq malunnartinniarlugu arlalinnik misigisassaqartitsissaaq.

Pisussat assigiinngitsut
Ukiuni kingullerni sisamani Nuummi Eqqumiitsulianik Saqqummersitsiviup innuttaasunut ammanerunissaq sulissutigaa, katersugaatillu katersugaasiviup illutaani inissisimaneri aamma nutartertarlugit. Taakku saniatigut katersugaatit pillugit ingerlatitseqqiinissamik suliarujussuaq meeqqanut, inersimasunut, takornarianut, atuartunut ilinniartunullu suliarisimavaat. Tamanna assigiinngitsunik aaqqissuussinikkut ingerlanneqartarpoq, soorlu eqqumiitsuliortunik oqaluttuartitsinikkut, nipilersornermik, filminillu takutitassiatigut, aammali podcast-inik, kulturikkut sammisassaqartitsinikkut ilinniartitsissutinillu suliaqarnikkut.

Nuummi Eqqumiitsulianik Saqqummersitsiviup Katersugaasiviit Ulluat 2019 malunnartinniarlugu pinnersaatit atorlugit qalipaasartoq Natascha Pedersen suleqatiginissaanik isumaqatigiissuteqarfigisimavaa. Eqqumiitsulianik saqqummersitsiviup katersugaataanik uumassuseqalersitsiniarluni suliaqarsimavoq. Nataschap Nuummi Eqqumiitsulianik Saqqummersitsiviup eqqumiitsulianik katersai isumassarsiorfigisimavai, modelillu takutitsisussat isikkussaat assigiinngitsut suliarineqassallutik. Taakkua Nuummi Eqqumiitsulianik Saqqummersitsivimmi, eqqumiitsuliatut uumassusilittut arfininngorneq 18. maaji nal. 15-17 angalaassapput.

Katersugaasivik ullorsiussaaq
Sisamanngorneq 16. maaji ullup qeqqanut eqqumiitsuliatut suliniummi erfalasup tullia Holm-ip Illuata silataani amuneqassaaq. Siullertut Miki Jacobsen kalaallit canadarmiullu inuiattut erfalasui akuleriisillugit eqqumiitsuliorsimavoq. Aappaattut savalimmiormioq Jóhan Martin Christiansen, Norge-mi oqaluffiup alteriata assiliartaa aallaavigalugu erfalasumik eqqumiitsuliaa amuneqassaaq. Erfalasumik amusinermut atatillugu kaffeqassaaq, teeqarlunilu sandwicheqarlunilu.

Tallimanngornermi 17. maaji nal. 15 eqqumiitsuliortut peqatigiiffiata KIMIKip saqqummersitaa ”No Limits” takornariartitsiffigineqassaaq, saqqummersitsiviup nammineq katersugaataanit ilanngussiffigineqartarluni. Katersugaasiviit ulluata nalliussinera naggaserlugu tusarnaagassanik marlussunnik tusarnaartitsisoqarumaarpoq. Sapaammi 19. maaji nal. 14 Nordisk Koncertkor eqqumiitsulianik saqqummersitsiviup initaani imaq pillugu erinarsuusianik tusarnaartitsissapput. Erinarsoqatigiit Nuuk Nordisk Kulturfestival 2019-mut imaq sammisarivaat.

Nuummi Eqqumiitsulianik Saqqummersitsivimmi erinarsuutit inini assigiinngitsuni tusarnaartissavaat, allatut eqqumiitsuliorneq uumassuseqalersissallugulusooq. Ulloq 22. maaji Nuummi Eqqumiitsulianik Saqqummersitsivik ullorsiortussaavoq; 2005-mi Eqqumiitsulianik Saqqummersitsivik Svend aamma Helene Junge-mit atoqqaarfissiorneqarpoq, illoqarfimmi innuttaasunut tunissutitut. Katersugaasivinnut ulloqartitsinerup malunnartinnera naggaserlugu nipilersortartoq Jacob Nyborg KIMIKip saqqummersitaani eqqumiitsuliat aaliangersimasut nipilersuutitalersussavai

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS