Namminiilivinnissaq: Nunarput piumassuseqarpoq, Savalimmiut aningaasaateqarpoq
Savalimmiuni ima ingerlalluartigisoqarpoq, inuuniarnermi atugarisat Danmarkimi atugarisanit qaffasinnerulersimallutik. Taamaakkaluartoq politikerit Danmarkimit avissaarnissamut nangaassuteqarput.
Savalimmiuni ingerlalluartoqarnera tikeraamit qularutigineqarsinnaanngilaq. Illut paarillluagaapput, biiliutigineqartut amerlapput nutaajullutillu. Sullorsuarnik aatsaat taama sanaartoqartigaaq, immap naqqani kaajallattarfik, sullorsualiat pingasut naapiffianniittoq, eqqartorneqartorujussuaq ilanngullugu. Tórshavnimili sanaartugaq tusaamaneqassutaasoq Glasir illoqarfik qulangerlugu portungaatsiarpoq, ilinniarfeqarfik igalaaminiunerusumik nigaliusanngorlugu sanaajusoq.
Aviisi AG taama allappoq.
GDP pigissaarnermut uuttuutitoq atoraanni, Savalimmiormiut nunarsuarmi pigissaarnerpaat akornanniipput innuttaasumut ataatsimut (2019) agguaqatigiissillugu 64.000 dollarsit aningaasaatigineqartarlutik, tamannalu nunanut pisuunut soorlu USA-mut Singaporemullu naapertuuppoq. Danmarkimut kisitsit 60.000 dollarsiuvoq.
Savalimmiormiut tassa Kalaallit Nunaannut sanilliullutik aningaasaateqarput avissaarnissamut namminiilivinnissamillu ajornarunnaarsitsisinnaasunik. Taamaakkaluartoq tamatumani susoqarpianngilaq. Sooq?
- Ilimagaara Savalimmiut namminiilivinniarnerannik unikaallatsitseqqasut maannakkorpiaq tassaasut Savalimmiuni politikkikkut partiit, innuttaasuni assingusumik akerliusoqanngimmat, Savalimmiuni namminiilivinnissamik suliniuteqarnermi pingaartitsinerpaajugunartoq, Høgni Hoydal, partiimut Tjodveldisflokkurinimut (Republikanerit) siulittaasoq, Lagtingimut ilaasortaq siornatigullu Folketingimut ilaasortaasimasoq.
- Politikkikkut aaqqissuussaanermit ullumikkut inissisimaffitsinni nikinnaveersimatinneqarpugut. Maannakkorpiaq naalakkersuisoqarpugut namminiilivinnissamik anguniagaqanngilluinnartunik, nangilluni oqarpoq.
Savalimmiut ullumikkut naalakkersuisoqatigiinnik Sambandsflokkurinimit, Folkeflokkurinimik aamma Midflokkurinimit naalakkersuisoqarpoq.
Høgni Hoydal oqarpoq, Savalimmiut Kalaallit Nunaatalu akornanni assigiinngissut angisooq tassaasoq, Kalaallit Nunaanni partiit nalinginnaasumik namminiilivinnissamik tapersersuisuunerat. Savalimmiuni partiit arlallit akerliupput, taakkualu maannamut amerlanerussuteqarsimallutik.
Imaluunniit allatut oqaatigalugu: Savalimmiut aningaasaateqarput, namminiilivinnissamik ajornarunnaarsitsisussamik, piumassuseqarnatilli, Kalaallit Nunaat piumassuseqarpoq, aningaasaateqarnanili.
- Ukiuni kingullerni 100-ni sukataarutiginnittoqarsimavoq, tamatumanilu namminiilivinnissamik anguniagaqartut akerliusunut nukittoorujussuarnut unammillersimallutik, tassaasunik Sambandspartiet aamma ilaatigut Socialdemokraterne, taanna oqarpoq. Ilorlikkut avissaartuunneq pissutigalugu ”Savalimmiuni namminiilivinnissamik suliaq Savalimmiuni siuleriiaalluni qitinnertut pissuseqarsimavoq: Siumut marlunnik alloriarluni ataatsimik kingumut allortarluni”.
Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk: