Namminiilivinneq: Mette F. naalagaaffimmit tapiissutit isumaqatiginninniutigineqarsinnaanerinut tunngasumik siusinaartumik aalajangiinianngilaq
Kalaallit Nunaat namminiilivippat naalagaaffimmit tapiissutit qanoq pineqarnissaannut tunngasumik, ministeriuneq Mette Frederiksen atorfimmi siulimi akerlianik siusinaarluni aalajangernianngilaq.
Kalaallit Nunaata namminersortut tunngaviusumik inatsisissaa innuttaasunut taasissutigineqassappat, naalagaaffimmit tapiissutit aamma danskit Kalaallit Nunaanni suliassanik suliarinninnerat ukuut arlaqanngitsut qaangiunneranni atorunnaassasut, 2017-imi ministeriunerusoq Lars Løkke Rasmussen oqariartuuteqarmat uitsatigineqarpoq.
Naalagaaffimmit tapiissutit 4,1 mia. kr.-nik amerlassuseqarput, taamaalillutillu nunatta karsiata isertitaasa affaanit amerlanerupput. Tamatuma saniatigut Danmarkip eqqartuussiveqarneq aamma politeeqarneq ingerlallugulu akilersorpai.
Lars Løkke Rasmussenip oqariartuutaa Kalaallit Nunaata siunissami qaninnerusumi namminiilivinnissaanut sulissuteqarnermut tunngatillugu ilungersunartuuvoq.
DF-meersoq: Kalaallit Nunaat tunngaviusumik inatsimmik akuersippat qanoq pisoqassava
Maanna ministeriuneq Mette Frederiksen (Soc.), apeqqummut allatut isiginnippoq, qulequtarlu pillugu Lars Løkke Rasmussenimit aalajangersimanerunngitsumik oqaaseqarpoq.
Dansk Folkepartimeersup Alex Ahrendtsenip ”Kalaallit Nunaanni tunngaviusumik inatsimmut siunnersuummik, inatsit tunngaviusussaq pillugu isumalioqatigiissitat saqqummiussaat, Kalaallit Nunaanni naalagaaffimmi qullersaqaleroat, Kalaallit Nunaannut naalagaaffimmit tapiissutit ingerlaannassanersut” ministeriunermut apeqqutigaa.
Ministeriuneq akissuteqarnermini namminersorneq pillugu inatsimmi isumaqatiginninniarnissamut aalajangersakkanut innersuussivoq:
Isumaqatiginninniartoqassaaq
- Kalaallit Nunaata namminersornermut inatsisaani § 21-mi aalajangersarneqarpoq, kalaallit inuiaat namminiilivinnissamik aalajangerpata, Kalaallit Nunaata namminiilivinnissaa piviusunngortinniarlugu Naalakkersuisut aamma Danmarkimi naalakkersuisut akornanni isumaqatigiinniarnerit aallartinneqassapput, Mette Frederiksen allappoq, nangillunilu:
- Kalaallit Nunaata namminiilivissinnaaneranut pisumik siusinaartumik akulerukkusunngilanga, aamma namminersorneq pillugu inatsimmi isumaqatiginninniartoqarnissaanik aalajangersarneqarsimasut ilanngullugit.
Tamatuma saniatigut nammineq paasinninnini naapertorlugu siunnersuut siullermi Kalaallit Nunaanni oqaluuserineqaqqaarnissaanik tunngaveqartussaasoq malugeqquaa, tamannalu malinnaaffigissallugu qilanaaraa.