Namminiilivinneq pillugu oqallinneq: Nammineq aqqutissarsiorneq ilinniassavarput

Filmip 'Håbets Ø'-p takutinneqarneranut atatillugu, festivalimi Cph:Dox-imi kalaallit namminiilivinnissaat pillugu oqallittoqarpoq

Politikkikkut oqallinnerni pitsaasumik torersumik oqallittoqarnissaa ujartorneqartuartarpoq. Ingammik namminiilivinnissaq sammineqartillugu oqallinneq sakkortullunilu aporaaffiusarpoq.

Kisianni ippassaq Grand Biomi Københavnimi filmip ’Håbets Ø’-p takutinneqarneranut atatillugu tusarnaartut misigaat, sammisaq torersumik oqallisigilluarneqarsinnaasoq, naak tunngaviit assigiinngissinnaagaluartut.

Kalaallit Nunaata nunasiaataasimanerminit artukkiissutinit nammineq aqqutini naniniartariaqaraa, Regine Møllerip aallaavigaa. Taanna ulluinnarni RUC-imi ilinniartuuvoq aamma peqatigiiffimmi Nalik-imi siulittaasuuvoq, Kalaallit Nunaat pillugu pisuujunerusumik kalaallit isaannit oqaluttuarnissamik suliniuteqartoq.

- Danskit aaqqissuussaaneri Nunatsinni atorsinnaasoriinnarlugit assiliinnartarneri taamaatissavarput, taanna ilaatigut pisortat ingerlanneqarneranut innersuussilluni taama oqarpoq.

- Aaqqissuussaanerit nukittuffigut tunngavigalugit kulturitsinnut naleqartitatsinnullu tulluarsarneqassapput.

IA-p folketingimut ilaasortaatitaata, Aaja Chemnitz Larsenip, taamatut oqariartuuteqarnera annermik isumaqatigaa.

- Namminiilivikkiartornermi ineriartortitsinitsinnut nammineq akisussaaffimmik tigusinissarput aalajangiisuuvoq, taanna oqarpoq.

Namminersornermut inatsisip ukiut qulit matuma siorna atuutilersinneqarneranit suliassaqarfimmik angerlaassisoqannginneranut innersuussilluni, ilanngullugu ima oqarpoq:

- Ukiuni qulini kingullerni Danmarkip Kalaallit Nunaat utaqqisimavaa aamma Kalaallit Nunaata Danmark utaqqisimallugu, maanna Kalaallit Nunaata tigusinissaa piffissanngorpoq.

Tamatuma saniatigut Regine Møllerip oqaatigaa, Kalaallit Nunaata nunanut tamalaanut attaveqarnini aamma niuernikkut attaveqarnini ineriartortinnissaanut pisariaqartikkaa, taamaalilluni Danmark aqqutigineqartuaannartariaqarnani. Tassunga atatillugu RAL-ip containerinik angallassinermi nunarsuup sinneranut ammaaniarluni periusissiaa nersualaarpaa.

Radikale Venstrep Kalaallit Nunaat pillugu oqaaseqartartuata, Martin Lidegaardip taanna oqariartuut paasisinnaavaa - kisianni Danmarkip Kalaallit Nunaatalu akornanni immikkuullarissumik attaveqartuaannarumaartoq isumaqarpoq – naak aamma kingulleq taaneqartoq namminiilivissagaluarpat.

Powered by Labrador CMS