Namminersortut inissialiaasa ineqarnermut akiliutit appartissavaat
– Aningaasaliisut namminersortut inissialiornermikkut aningaasarsiornerat Demokraatit akornutissaqartinngilaat, Jens-Frederik Nielsen oqarpoq.
– Nuummi illoqarfinnilu angisuuni inissaaleqinerujussuarmut apeqqutaaginnarpoq neqeroorutigineqarsinnaasut piumaneqartullu amerlassusiat. Ullumikkut takusinnaavarput piumaneqartut neqeroorutigineqarsinnaasunit amerlanerujussuusut, tuniniaavimmilu equngassuteqarneq tamanna pissutigalugu illut ineqarnermullu akiliutit qaffasissuupput. Equngassuteqarneq tamanna qaangerniassavarput, tamatumunngalu aqqutissatuaavoq amerlanerusunik inissialiorneq, tamakkua namminersortunit pisortanilluunniit aningaasalerneqaraluarpata, Demokraatit siulittaasuat Jens-Frederik Nielsen Sermitsiamut oqarpoq.
Inatsisartunut kommunimullu qineqqusaarnermi ammasumik aaqqiagiinngissutaavoq Sermersuup periusianik taaneqartoq, tassani kommunip inissiat aningaasaliisunit namminersortunit akisuumik akilerlugit attartoriarlugit inissiat inissiamik utaqqisunut, ineqarnermut akiliummik akikitsumik akilersillugit attartorteqqittarlugit.
Aaqqissuussineq taanna, Kommuneqarfik Sermersuup 2015-imiilli atorsimasaa, atorlugu Nuummi ilaqutariit 416-it initaarsimapput ineqarnermut appasissumik akiliisarlutik, periusilli taassuma atorneratigut kommunip amigartoorutit 11 millioner koruunit akilertarpai.
Sermersuup periusia Namminersorlutik Oqartussat kommunit inatsisaannik unioqqutitsinertut isigaat. Kommuneqarfik Sermersuup taamaannginnerarpaa. Suliassaq maanna nunatsinni kommuninut Nakkutilliisoqarfimmiippoq.
Allaaserineqartoq aviisimi Sermitsiami tamakkiisumik atuaruk, aviisi uani pisiarineqarsinnaavoq: