Namminersorlutik Oqartussat: Sunngiffimmi aalisartut kapisilinniarnissamut akuersissuteqalissapput

Ukioq manna kapisilittassiissutigineqartut 30 tonsiupput – 20 tonsit inuussutissarsiutigalugu aalisartunut sinneri sunngiffimmi aalisartunut.

Wikimedia

redaktionen

ataasinng 06. agg 2018 16:28

Annonse

Aggustip 15-iannit oktobarip 31-annut kapisilinniartoqassaaq.

Naalakkersuisut aggustip aappaanni 2018-imi Namminersorlutik Oqartussat kapisilinniarneq pillugu nalunaarutaat kingullermik 2015-imi nutarterneqartoq arlatsigut pingaarutilinnik allannguiffigivaat.

NASCO ukiumoortumik ukioq manna ataatsimiimmat NASCO-mi ilaasortat akuersissutigaat nunarput kapisilinnik 30 tonsinik ukiuni tulliuttuni pingasuni pisaqarsinnaassasoq.

Kapisilinniarneq

Inuussutissarsiutigalugu sunngiffimmilu aalisartut kapisilinniarnerminni qassutit tissukartartut atorunnaartussaassavaat.
Sunngiffimmi aalisartut taamaallaat namminneq atugassaminnik kapisilinniarsinnaassapput.
Nalunaarummi allannguutit pingaarnerit ilaat tassaavoq sunngiffimmi aalisartut kapisilinniassagunik aatsaat akuersissummik peqqaarlutik kapisilinniartalersinnaanissaat.
Pinngitsoorani kapisilittarisimasat pillugit, kapisilinniarsimanngikkaluartut aamma kapisilinnik pisaqarsimanngitsut nalunaaruteqartussaatitaalissapput. Akuersissutaatillit tamarmik kingusinnerpaamik decembarip aallaqqaataa nallertinnagu nalunaaruteqartalissapput.
Inuussutissarsiutigalugu sunngiffimmilu aalisartut pisanik pinngitsoorani nalunaaruteqartussaatitaaneq tunngavigalugu nalunaarsimanngippata, aappaaguani kapisilinniarnissamut akuersissummik tunineqarsinnaassanngillat.

/Namminersorlutik Oqartussat

- Nunatta Kitaani kapisilinniarnerup killilersorneqarneranut isumaqatigiissut naapertorlugu nunatsinni kapisilinniartoqarsinnaavoq, nunap nammineq atugassaatut aalisartoqarsinnaalluni – imminut pilersorluni aalisarnertut, Namminersorlutik Oqartussat tusagassiutinut nalunaaruteqarput.

Isumaqatigiissut naapertorlugu nunarput pisuussaaffeqarpoq nunatsinni kapisilittarineqarsimasut nunanut allanut tunisassanngikkai, nunatsinnili taamaallaat atorneqartussatut, nerineqartartussatut, aalisarneqartassasut.

Inuussutissarsiutigalugu aalisartut tunitsivinnut kalaalimineerniarfinnullu taamaallaat siunissami tunisisinnaalissapput.

Taamaalilluni neriniartarfinnut, napparsimavinnut assigisaannullu toqqaannartumik tunisisarunnaassapput. Inuussutissarsiutigaluguli aalisartut kalaalimineerniarfinni tunisisarsinnaanissaat, peqqussummi allannguutit pingaarnersaasa ilaanni tamanna erseqqissaassutigineqarpoq.

Ukioq manna KNAPK nioqqutissiorfinnut tunisisinnaannginnissaq pillugu NASF/ASF-ilu isumaqatigiissutigineqarpoq.

NASF aamma ASF tassaapput kapisillit amerliartoqilernissaat siunertaralugu suliniaqatigiiffiit, Islandimi USA/Canadamilu.

inuiagatigiit nunatsinnit