Namminersorlutik Oqartussat: KNR USA-mut angalanissamut tapiiffigineqarnermini inatsimmik unioqqutitsivoq

KNR-ip USA-mit tapiiffigineqarluni radiukkut TV-kkullu ilanngutassiorsimanera inatsimmik unioqqutitsineruvoq

KNR-ip amerikamiut tapiiffigisaannik tusagassiortut marluk USA-mit ilanngutassioriartortillugillu aallakaatitassioriartortimmagit inatsimmik kukkussuteqartoqarsimassagunarpoq, KNR nammineerluni ilanngutassiamini allappoq.

KNR-ip Namminersorlutik Oqartussani inatsisilerinermik immikkoortortoqarfik nalileeqqusimavaa, angalanermut atatillugu radiukkut TV-kkullu aallakaatitsisarneq pillugu inatsit unioqqutinneqarsimanersoq.

Akissutigineqarporlu tusagssioriartorluni angalanermut tapiiffigineqarneq aningaasaliiffigineqarnermut assigusoq. Radiukkut TV-kkullu tusagassiornissamut aningaasaliiffigineqarissaq inerteqqutaavoq. Knr.gl-imullu ilanngutassiornissaq inerteqqutaanngilaq.

Angalaneq ullunik aqqaneq-marlunnik sivisussuseqarsimavoq, timmisartumut ilaassutissat USA-milu akunnittarfimmiinnerit USA-mit akilerneqarsimapput. KNR naapertorlugu USA-mit taamaallaat piumasaqaatigineqarsimavoq, KNR angalasimanermit saqqummiussisasoq, sunali pillugu qanorlu annertutigisumik piumasaqartoqarani.

Allanik tunuliaqutaqarani saqqummiisartoq Qarsoq Høegh-Dam tassaavoq USA-mit tapiiffigineqarsimanermik isornartorsiuisoq, tassunga peqatigitillugu KNR isornartorsiorpaa, USA-mut isornartorsiuerpalunngitsumik ilanngutassiorsimanerarlugu. Isornartorsiuinerup malitsigisaanik KNR-ip Namminersorlutik Oqartussani inatsiseqarnermut immikkoortortaqarfik nalileeqqusimavaa.

- Taanna (inatsisilerituut naliliinerat) soorunami atuaqqissaartariaqarparput, inatsisillu paragrafillu tamarmik malinnissaat qulakkeertariaqarparput. Ileqqorissaarnermut eqqortumillu iliornissamut kukkusumik iliorsimalluta misigisimanngilagut, KNR-ip nutaarsiassaqartitsiviani pisortaq Mikkel Bjarnø Lund KNR-imut oqarpoq.

- Aaqqissuisunit tusagassiornermullu kiffaanngissuseqarnissatsinnut qulakkeerisimavugut. Taamaalilluta kiffaanngissuseqartumik paasissutissanillu isornartorsiuisunik piumasaqaataasunik atuisartutsinnut qulakkeerivugut.

Mikkel Bjarnø Lundip nassuiaatigaa, aaqqissuisunit kiffaanngissuseqarluarnissamik qulakkeerinnissimagamik tamanna aningaasanik tapiiffigineqarnertut isigineqanngitsoq.

Powered by Labrador CMS