Namminersorlutik Oqartussat: Coronamut akiuussutissalerneqaritsi

Akiuussutissaq AstraZenicameersoq Nunatsinni atorneqanngitsoq pillugu qulartoqarnera tunngavigalugu nunatsinni innuttaasunit atorneqarusunnginnera Namminersorlutik Oqartussani ernummatigineqarpoq.

- Kalaallit Nunaanni amerlanerpaat akiuussutissanik kapitinnissaat pingaaruteqartorujussuuvoq. Akiuussutissat Covid-19-imik napparsimarujussualernissamut toqussuteqarnissamullu illersuutaapput. Tamatuma peqatigisaanik tuniluunnerup nunatsinnut pinerani, tamannami saneqqunneqarsinnaanngitsutut isigineqartariaqarmat, aseruisussamik tuniluuttoqalernissaata pinngitsoortinnissaanut aqqutissatuaavoq, Namminersorlutik Oqartussanit tusagassiorfinnut nalunaaruteqarnermi oqaatigineqarpoq.

Bivirkningerne

- Akiuussutissat assigiinngitsut marluk, Moderna-meersut aamma Pfizer-BioNTech-imeersut atukkagut niaqorlutsitsisinnaapput, nukinnik anniartitsisinnaapput/iluaalliortitsisinnaapput aammalu kapitiffik pullassinnaavoq, qasoqqatitsisinnaapput, qiiarujutsitsisinnaapput kissarneqartitsisinnaallutillu, taakkuli pilertortumik qaangiuttartut erseqqissaassutigineqarpoq.

Namminersorlutik Oqartussanit oqaatigineqarpoq, akiuussuitssat taakku marluk akiuussutissamit AstraZenicameersumit teknologi alla atorlugu sanaajusumit allaannerulluinnartut.

- Akiuussutissat Moderna-meersut aamma Pfizer-BioNTech-imeersut akiuussutissaapput RNA-nik sanaajusut. Akiuussutissat marluk taakku inunnut millionilippassuarnut kingunerluuteqanngitsumik atorneqareerput. Taamaallaat akiuussutissat AstraZeneca-meersut atorneqarneri taqqanik milittoornernik malussarfigineqarsimapput.

- Kalaallit Nunaanniittut tamarmik Covid-19-imut akiuussutissanik kapitinnissamut neqeroorfigineqarunik akuerseqqullugit kaammattorneqarput – imminut inuiaqatigiillu eqqarsaatigalugit, Nunatsinni oqartussat kaammattuipput.