Namminersorlutik Oqartussat ulloq unnuarlu paaqqinnittarfiutaat artukkerneqartut
Nunami meeqqanut inuusuttunullu ulloq unnuarlu paaqqinnittarfiit katillutik 22-usut misissuiffigeqqissaarneqarneranni paasineqarsimavoq, meeqqat Namminersorlutik Oqartussat ulloq unnuarlu paaqqinnittarfiutaanni najugaqartut atugarliornerpaasut.
Meeqqat Namminersorlutik Oqartussat ulloq unnuarlu paaqqinnittarfiutaanni najugaqartut alliartornerminni pissusilersuutitigullu, paaqqinnittarfinni imminnut pigisuni kommunillu paaqqinnittarfiutaanni najugaqartunit, ajornartorsiuteqarnerusarput.
Atugarissaarneq pillugu ilisimatusarnermut nalilersuinermullu qitiusoqarfiup, VIVE, misissueqqissaarluni nalunaarusiamini, "Kalaallit Nunaanni ulloq unnuarlu paaqqinnittarfeqarnermik misissuneq", inerniliuppaa.
-Misissuinrup takutippaa, meeqqat Namminersorlutik Oqartussat namminneq paaqqinnittarfiutaanni najugaqartut, paaqqinnittarfinni imminnut pigisuni kommunillu paaqqinnittarfiutaanni najugaqartunut sanilliullutik unammillagassaqarnerusartut. Tamanna meeqqat tarnikkut atugaannut tunngatillugu atuuppoq, meeqqallu ulorianarsinnaasumik pissusilersortarnerat (ass. ikiaroornartumik hashimik imminullu ajoqusertarnermik misilittagallit) atuartarnerallu eqqarsaatigalugit aamma tamanna atuuppoq, nalunaarusiami allassimavoq.
Tamatuma takutippaa, Namminersorlutik Oqartussat ulloq unnuarlu paaqqinnittarfiutaanni meeqqat katsorsarneqarnissamik pisariaqartitsinerusut ukkatarineqarnerulersimasut, paaqqinnittarfiillu alla meeqqanik sumiginnagaasimasunik tigusaqarnerusalersimasut.
Perorsaanerup pitsaassusaa nikerartoq
Kalaallit Nunaanni katillugit 22-nik ulloq unnuarlu paaqqinnittarfeqarpoq, taakkunannga aqqanillit Namminersorlutik Oqartussanit ingerlanneqartuupput. Arfineq pingasut namminersortunit assigiinngitsunit ingerlanneqarput, pingasullu kommuninit pingasunit ingerlanneqarlutik.
Meeqqat inuusuttullu 325-t missaannik amerlassusillit, 0-miit 23-nut ukiullit, nunami ulloq unnuarlu paaqqinnittarfinni najugaqarput. Taakkunannga 296-it 0-miit 17-inut ukioqartuupput. Namminersorlutik Oqartussat paaqqinnittarfiutaanni meeqqat inuusuttullu 170-it missaanniittut najugaqarput.
Namminersorlutik Oqartussat ulloq unnuarlu paaqqinnittarfiutaanni aqqaniliusuni perorsaanerup pitsaassusaa nikerarpoq. Sumiiffiit ilaanni perorsaaneq pitsaasulipilussuuvoq, sumiiffinnili allani unammillernarluni, nalunaarusiami erseqqissarneqarpoq.
Nalunaarusiami qitiutinneqartut:
Misissuinermi angusat aallaavigalugit VIVE-mit kaammattuutigineqarput:
Namminersorlutik Oqartussat paaqqinnittarfiutaanni perorsaalluni sulinerup pitsaassusaa qaffanneqassasoq
Susassaqartut akornanni suleqatigiinnerup pitsaanerulersinneqarnissaa sulissutigineqassasoq
Ulloq unnuarlu paaqqinnittarfeqarnermi aningaasaqarneq paasiuminarninngortinneqassasoq
Kommunit misissuisarnerat iliuusissatullu pilersaarusiortarnerat nakkutigineqarnerulissasoq
Namminersorlutik Oqartussat paaqqinnittarfiutiminnik piginnittuuginnassasut, sulinerminnili kommuninik peqataatitsinerusassasut
VIVE taamatuttaaq 2020-mi Kalaallit Nunaanni angajoqqaarsiaqartitsisarnermik misissuissamaarpoq.
- Misissuineq manna naammassineqarpat, angerlarsimaffiup avataanut inissiisarneq tamakkiisumik misissoqqissaarneqarsinnaanngussaaq, taamalu Namminersorlutik Oqartussat kommunillu meeqqat inissinneqarsimasut atugaannut ineriartornerannullu tunngatillugit suliaqarnerannut tapertaasinnaanngussalluni, VIVE .