Namminersorlutik Oqartussat tunumi ilisimatusarfik ingerlatiinnarusuppaat

Ilisimatusarnermik ingerlatsivik Zackenberg, Namminersorlutik Oqartussanit pigineqartoq qallunaallu naalagaaffianit Aarhus Universitetigoorlugu aserfallatsaalineqarlunilu ingerlanneqartoq, pillugu suleqatigiinnermik isumaqatigiissut aappaagu atorunnaartussaavoq. Taamaattumik Naalakkersuisut ukioq nikitsinnagu ilisimatitsissutigisussaavaat nunatta ilisimatusarfimmik suleqateqarnini ingerlatiinnarnissaa kissaatigineraa.

Maannalu Namminersorlutik Oqartussat qallunaat naalagaaffiannut nalunaaruteqarsimapput issittumi ilisimatusarfiit annersaannut suleqatigiinneq ingerlatiinnarneqarusuttoq.

- Suleqatigiinnermut illuatungeriit - Namminersorlutik Oqartussat, Aarhus Universitet, Pinngortitaleriffik kiisalu Asiaq - oqaatigisimavaat, ullumimut isumaqatigiissutaasup atuuttup qujamasuutigimmassuk, aammalu suleqatigiinnissap ingerlaannarnissaa kissaatigineqarmat.

Aningaasaqarnermut aatsitassanullu naalakkersuisoq, aamma
Naalakkersuisut siulittaasuata tullersortaa siulleq, Demokratineersoq Anda Uldum oqaluttuarpoq, imalu nangilluni:

- Uanga tulluusimaarutigaara, inuiattut mikisunnguusutut nunarsuarmioqatigiinni ilisimatusarnikkut siuttutut inissisimanerput.

Ilisimatusarnermik ingerlatat matoqqasuusut saniatigut misissuinermilu suliat qaavisigut, ilisimatusarnermik ingerlatsivik Zackenberg aamma tassaavoq avatangiisinut nakkutilliiviusoq annertooq, taaguusteqartinneqartoq Greenland Ecosystem Monitoring.

Qallunaat naalagaaffiannik suleqateqarnerup ingerlatiinnarneqarneratigut, Kalaallit Nunaat ullumikkut misissueqqissaartarfimmik pigisaqarpoq, ingerlanneqarneranulli aserfallatsaalinikkullu aningaasalersorneqarnera Danmarkimit isumagineqarluni, Namminersorlutik Oqartussat taama tusagassiuutinut nalunaarumminni allapput.

Atuaruk: Ilisimatusarneq politikerit malinnaaffigaat