Namminersorlutik Oqartussat suliffeqarfiutaannut piumasaaqaateqarnerulerneq

Naalakkersuisut naatsorsuutigaat, 2019-imi Nunap Karsia 253 millioner koruuninik immerneqassasoq, tamannalu ukioq manna aningaasanut inatsimmut sanillersuullugu 73 millioner koruuninik amerlanerupput.

41 procentimik qaffariaat

2018-miit 2019-imut 41 procentimik qaffariaateqartitsissaaq. Tamanna 2019-imut aningaasanut inatsisissatut siunnersuut ataasinngormat Aningaasaqarnermut Naalakkersuisup Pele Brobergip saqqummiussaani allassimavoq.

2018-imut aningaasanut inatsimmi namminersorlutik oqartussat sulifeqarfiutaasa isertitaat ukiumut 178 millioner koruunit missaanniipput. 2018-miit 2021-p tungaanut iluanaarutit, aktianik piginneqatigiiffinnit piginneqataaffinnit iluanaarutit tunisinerillu katillugu 718 millioner koruuninik iluanaarutiginissaat naatsorsuutigineqarpoq.

Naalakkersuisoq isumalluartoq

Ukioq manna nutaamik Aningaasaqarnermut Naalakkersuisoqalerpoq ukiunullu tulliuttunut sisamanut naatsorsuutigineqartut allarluinnaapput

Piffissami 2019-miit 2022-p tungaanut 864 millioner koruuninik tikillugit iluanaaruteqartoqarnissaa angunianeqarpoq.

Ilulissani, Nuummi Qaqortumilu nutaanik mittarfiliortitsinissamik pilersaarutit akuerineqarnissaannut iluanaarutit amerlanersaat aningaasaliissutissatut immikkoortinneqarput.

Nangaanartut

Namminersorlutik Oqartussat tungaanniit iluanaarutissatut ilimagisat pillugit oqaasertaliussami allassimavoq:

- Aktiaateqarluni ingerlatseqatigiiffinnit Namminersorlutik Oqartussanit pigineqartunit iluanaarutinit akiliutigineqartut ingerlatseqatigiiffinni aningaasaqarnikkut allanngoriartorneq ingerlatseqatigiiffiillu sinneqartoorutaajunnartunik atugassanngortitsinissamik aalajangiinerat apeqqutaatillugu missiliorneqarput. Iluanaarutit uuttorneqakkajuttarput ingerlatseqatigiiffiit isumannaallisaanissamik pisariaqartitsinerata nutaanillu aningaasaliiffigineqarnissamik pisariaqartitsisinnaanerata aamma aktiaatillit aningaasaliissutiminnit iluanaaruteqarnissamik piumasaqaataasa akornanni oqimaaqatigiissitsitsinikkut, oqaaseqaatini allassimavoq.