Namminersorlutik Oqartussat siulersuisut sulisussarsiortarnerat nukittorsaaffigaat

Namminersorlutik Oqartussat nittartakkamik nutaamik ullumi ammaapput, siunertarineqarluni Namminersorlutik Oqartussat ingerlatseqatigiiffiutaasa siulersuisuini ilaasortassanik nutaanik sulisussarsiortarnerup nukittorsarneqarnissaa.

Naalakkersuisut Siulittaasuata Naalakkersuisoqarfiata Nunani Avannarlerni siulersuisuni ilaasortassanik sulisussarsiortarfit annersaat, nBoard, suleqatigalugu www.bestyrelser.gl saqqummiuteqammerpaat, taanna aqqutigalugu ingerlatseqatigiiffinni sulisussarsiorneq ammasumik, ersarissumik pikkorissunillu sulisussarsiorluni ingerlatsinerit ikiorsiullugit pisassassaaq, Ingerlatseqatigiiffinnut Allattoqarfimmi pisortaq Lars Balslev erseqqissaavoq.

Kikkulluunniit peqataasinnaasut

Nittartagaq Namminersorlutik Oqartussat aktiaateqarluni ingerlatseqatigiiffiutaanut
aalajangersimasumut arlalinnulluunniit siulersuisunngorusuttunut qinnuteqarsinnaasunullu tamanut saaffiginnippoq, Namminersorlutik Oqartussat tusagassiorfinmit nalunaaruteqarnerminni ilisimatitsipput. Piumasaqaataaginnarporlu akeqanngitsumik imminut ilisaritinnermik pilersitsinissaq. Qinigassatut ikkussinermi taamatut danskit paasissutissanik katersivianni takussaalissaaq taamaalillunilu Danmarkimi siulersuisuni atorfinnut pilerinartunut nittarsaanneqarluni.

Imminut ilisarititsissummik nalunaaruteqaraanni imatut ingerlatsisoqassaaq:

1. Siulersuisuni ataasiakkaanni pisariaqartitat aallaavigalugit ingerlatseqatigiiffinnut allaffeqarfiup siulersuisussarsiulernerit tamaasa nalilersuutissanik suliaqartassaaq siulersuisussarsiornermi nBoard-ip siulersuisussarsiortarnermi siunnersuisuisa atortagassaanik,
2. Siulersuisussarsiorluni allagarsiissut bestestyrelser.gl-imut nalunaarsorneqarsimasunut tamanut, nBoard.dk-mut nassiunneqartassaaq aammalu Linkedin aqqutigalugu saqqummiunneqartassalluni, taamaasillutillu soqutiginnittut ataasiakkaat saqqummiussaq aallaavigalugu qinnuteqarsinnaasassallutik (qinnuteqarsinnaassagaanili bestyrelser.gl-imut imaluunniit nBoard.dk-mi nalunaarsorneqarsimasariaqarlunilu akuerineqarsimasariaqarpoq),
3. Qinnuteqarnissamut killissarititaasoq nallileraangat nBoard ́p siulersuisussarsiortarnermi siunnersortaasa qinnuteqarsimasut uuttuutissatut tunngavissat aallaavigalugit misissortassavaat, nBoard-ip misissuisimanera aallaavigalugu siulersuisunngorsinnaasutut piukkunnaatillit allattorsimaffiat
4. Ingerlatseqatigiiffinnut allaffeqarfimmit tiguneqartassaaq taakkulu Naalakkersuisunut suliareqqinneqartussanngorlugit ingerlateqqinneqartassapput,
5. Qinnuteqartoq Piginnittuusunit (Naalakkersuisut) akuerineqareerpat ataatsimeersuartitsisoqassaaq, tassanilu qinnuteqartoq pisortatigoortumik siulersuisuni ilaasortanngortinneqassalluni.

- Siulersuisuni kulturimik 2.0 nBoardimi pilersitsiniarluta sulissutigaarput, siulersuisuni atorfiit ammasumik pissarsiornerit ikiorsiullugit inuttalerneqartussanngorlugit. Takusinnaavarput, siammarterivimmik tunngaveqarluni iliuuseqarneq taanna suliffeqarfinnut, piginnittunut qinigassanullu ilippanartunik angusanik pitsaanerpaanik pilersitsisartoq.” nBoardip pisortaa Joakim Bruchmann oqarpoq.'

Suliassaq pingaarutilik

Inuit 2500-nik amerlanerusut sulisussarsiortarfimmi suliffeqarfinnit hunnorujulikkaanit atorneqartartumi imminnut ilisaritsissummik ikkussereersimapput.

Ingerlatseqatigiiffinnut Allattoqarfimmit oqaatigineqarpoq, Namminersorlutik Oqartussat ingerlarseqatigiiffiutaat nunap tunisassiaasa ataatsimut nalingisa 60 procentiinik suliaqartartut.

- Taamaattumik Namminersorlutik Oqartussat piginnittuisa soqutigisaat akuerisinnaajumallugit Namminersorlutik Oqartussat pigisaasa nalillit pikkorissumik aqunneqarnerisa qulakkeerneqarnissaat Naalakkersuisut suliassaasa pingaarnerpaat ilagaat.