Kalaallit Airports
Namminersorlutik Oqartussat Qaqortumi mittarfik namminneq aningaasalertariaqarpaat
Qaqortumi mittarfissaq pilersaarutaasoq Namminersorlutik Oqartussanit aningaasanit taamaallaat aningaasalersorneqassaaq. Tamanna attaveqaqatigiinnermut naalakkersuisup Erik Jensenip inatsisissatut siunnersuutip tusarniaassutigisaani atuarneqarsinnaavoq.
Inatsisissatut siunnersuummi atuarneqarsinnaavoq, Kujataani mittarfissaq tapiissuteqanngitsumik ingerlanneqarsinnaanngitsoq.
Kingunerisassat misissorneqarnerat
Deloitte Namminersorlutik Oqartussanut mittarfiliornissamut suliniutit pillugit inuiaqatigiit aningaasaqarnerannut kingunerisassanik misissuissussivoq.
- Tassani allassimavoq Nuummi aamma Ilulissani mittarfinnik sanaartornissaq, imminut akilersinnaanissaq pillugu timmisartoqarfiit pillugit inatsimmi aalajangersakkanut naammassinnittoq. Qaqortumi Mittarfik missingersuutini aningaasaqarnikkut misissueqqissaarnermi ilaatinneqanngilaq, tassami Qaqortumi mittarfissamut tapiiffigineqanngitsumik ingerlatsinissamut tunngavissaqanngimmat, inatsisissamut siunnersuummi nassuiaatini naqissuserneqarpoq, tassani Kalaallit Airportsip Ilulissani, Nuummi aamma Qaqortumi sanaartornissaanut, aningaasaliinissaanut aamma ingerlatsinissaanut sinaakkutik aamma tunngaviit qitiusut aalajangersarneqarput.
Tamatuma kingunerisaanik Qaqortumi mittarfiliorneq iluanaarutaaffiusinnaanngitsoq nassuiaatini oqaatigineqarpoq:
- Taamaattumik taassuma ileqquusumik nunap karsianit tamakkiisumik aningaasalersorneqarnissaa naatsorsuutigineqarpoq.
Allatut oqaatigalugu: mittarfiup sanaartorneqarneranut nunanit tamalaanit aningaasaliisartunit taarsigassarsinikkut aningaasalersorneqarnissaa naatsorsuutigineqanngilaq.
Atugarissaarnermut aningaasaliineq
Illuanik Qaqortumi mittarfik atugarissaarnermut aningaasaqarnikkut aningaasaliinertut oqaatigineqarpoq, sumiiffimmi ineriartornermik kinguneqartussaq.
Aamma atuaruk: Mittarfiit akisunerujussuusinnaapput
- Kisiannili Qaqortumi Mittarfissap nunap immikkoortuani qulimiguulimmik sullissinerup ilaa annertooq atorunnaarsissagaa naatsorsuutigineqarpoq, tassami qulimiguulimmik angallannerup 50 procentiata missaa, Qaqortumi mittarfiup illoqarfimmut qanittumiittup nutaap toqqaannartumik malitsigisaanik atorunnaassasoq naatsorsuutigineqarmat. Tamanna aningaasartuutinik, ullumikkut kiffartuussinissamut isumaqatigiissutitut iluseqartunik, nunap karsianit akilerneqartartunik atorunnaarsitsissaaq, inatsisissamut siunnersuummi nassuiaatini tusarniaatigineqartuni tamanna atuarneqarsinnaavoq.
Tusarniaanermut akissuteqarnissamut ulloq 19. februar killigitinneqarpoq.