Namminersorlutik Oqartussat pillugit aviisi inoqutigiinnut tamanut

Namminersorlutik Oqartussat ajunngitsumik ajortumillu. Namminersorlutik Oqartussat ukiunik qulinngortorsiorneranni Tusagassiorfik Sermitsiaq.AG piffissami matumani aviisimik inoqutigiinnut agguaassassamik saqqummersitsivoq.

- Nalliuttorsiornermi aviisi nuannersuinnarmik takussutissiinngilaq. Nalitsinnimi ajornartorsiuterpassuit ilungersunartut aaqqinneqarnissaat amigaataasoq allatut saqqummiussissagaanni eqqumiissaaq. Nuna meeqqanik paarsinerluffiuvoq, atornerluisoqarpoq, pinerluttoqarpoq, naligiinngitsoqarpoq, nunaqarfiit inuerukkiartorput aamma peqqinnissaqarfimmi isumaginnittoqarfimmilu sulisussarsiorniarnermi unammillernartoqarpoq, ilinniarnikkullu anguniakkat angunngilagut. Qujanartumilli aamma nuannaarutissaqarpoq, ilaatigut attaveqaqatigiinnikkut pilersaarutit annertuut, aningaasaqarnikkut siuariartorneq aamma ullumikkut ippassarmit ajunnginnerunissamik angusaqarusunneq.

Tusagassiorfimmi Sermitsiaq.AG-mi pisortaq, Christian Schultz-Lorentzen, taama oqaluttuarpoq, taanna aviisimik inoqutigiinnut agguaanneqartumut, Namminersorlutik Oqartussat juunip 21-anni 2009-imi atuutilersinneqarneranit ukiuni qulinngortorsiornermi saqqummersitsisuuvoq. Piffissami matumani aviisi nalliuttorsiutaasoq 72-nik qupperneqartoq inoqutigiinnut tamanut agguaanneqarpoq. Aviisit naqitikkat 26.500-nit ikinnerunngillat, taakkulu 5 tonsinik oqimaassuseqarput. Tamannalu nuna tamakkerlugu inoqutigiinnut agguaanniarnera suliassarujussuuvoq.

- Aviisi soorunami ukiuni qulini qummut imaluunniit ammut ingerlanermik tamakkiisumik takussutissiinngilaq, kisianni nunap oqaluttuarisaanerani pingaarutilimmik assigiinngitsunik soqutiginartunik, neriulluarnartunik, neqerooruteqarpoq, allagissaartunik, ilaatigullu ersinartunik aamma nuannaarunnaarnartunik takussutissiivoq, kisianni pingaartumik ineriartornermik takussutissiilluni. Namminersorlutik Oqartussat uninnganngisaannarput. Suli allanngoriartorput, Christian Schultz-Lorentzen oqarpoq.

Powered by Labrador CMS