Namminersorlutik Oqartussat nittarsaassinerat peqataasunit pakatsiffigineqartoq

Namminersorlutik Oqartussat ukiumoortumik nunatsinni atorfinnik Danmarkimi nittarsaassinerannut suliffeqarfiit peqataanerminnut 30.000 koruunit angullugit akiliuteqarsimapput. Peqataasulli arlallit angusatik naammagivallaanngilaat.

Suliffeqarfiit arlallit nittarsaassisoqarneranut takkuttoqarpallaarsimannginnera pakatsissutigisimavaat, isumaqarlutillu nittarsaassinissamut naammattumik pilerisaarisoqarsimanngitsoq.

Namminersorlutimmi Oqartussat Danmarkimi ilinniagaqartunut martsip 26-ani Københavnimi martsillu 27-ani Århusimi atorfinnik nittarsaassimmata ilinniagaqartut katillugit 70-it missaannaanniittut takkussimapput.

Kalaallit Nunaanni Sulisitsisut nittarsaassisoqarneranut aamma peqataatitaqarsimapput, sulisitsisullu kattuffiannit pakatsisimaarluni angerlartoqarsimalluni.

- Soorunami amerlanerusunik takkuttoqannginnera ajusaarutigaarput. Nittarsaassisoqarneranumm peqataaniarluta akiliuteqarsimavugut. Peqaaniaraani 15.000 koruunit missaannik akeqarpoq, tamatumalu saniatigut timmisartunut bilitsit akunnittarfinnilu unninerit akeqarlutik, Sulisitsisut allattoqarfianni pisortaq Karsten Lyberth-Klausen Sermitsiaq.AG-mut oqarpoq.

Namminersorlutik Oqartussanit ajornartorsiut ilisarineqarpoq. Nittarsaassisarnermi siunertaavoq, kalaallit ilinniakkaminnik naammassinnissimasut amerlanerit nunamut utertinneqarnissaat. Suleqatigiissitat nittarsaassineq nalilersorsimavaat, aappagulu takkuttussat amerlanerulersinneqarnissaannik suliniuteqarnissaq neriorsuutigalugu.

- Aappaagu peqataasussat qanoq amerlanerulersinneqarsinnaanerat aamma suliffeqarfiit peqataatitaqartut qanoq pissarsinerusinnaanerat immikkut ukkataralugit ukioq manna nittarsaassisimaneq soorunami nalilersussavarput, Jørgen Jessen Naalakkersuisut Siulittaasuata Naalakkersuisoqarfianeersoq oqarpoq. Taanna ukioq manna Danmarkimi nittarsaassinermut aqutsisooqatigiinnut ilaasimavoq.

RAL: Ilinniagaqartunut qaaqqusissut kingusinaarpallaartumik nassiunneqarsimavoq

Suliffeqarfiit katillutik 23-t atorfinnik nittarsaassinermut peqataasimapput. Nittarsaassineq suliffeqarfimmut qulit inorlugit sulisulimmut 10.000 koruuninik akeqarpoq, suliffeqarfinnullu qulit sinnerlugit sulisulinnut 17.000 koruuninik akeqarluni.

Sulisitsisullu kisimik pakatsisimanngillat. Royal Arctic Linep Kommuni Kujalliullu nittarsaassinermit aamma pissarsiaqarpallaarsimannginnertik pakatsissutigisimavaat.

- Nittarsaassinermi suliat ajunngillat, ilinniagaqartunilli qaaqqussutit kingusinaarpallaartumik nassiunneqarsimapput. Taamaammat amerlavallaanngitsut takkussimapput, tamannalumi soorunami pakatsinarpoq, RAL-imi ilinniartitaanermut ataqatigiissaarisoq Naasunnguaq Heilmanna-Semsen oqarpoq.

Kommuni Kujallermit sulisunik atorfinnik nittarsaassinermut aamma allartitsisoqarsimavoq, tassani ilinniagaqartut kommunimi sulilersinnaanerannik pilerisaarniarlugit. Kommuni CV-nik pissarsisimavoq, takkuttukippallaarnerali aamma pakatsissutigineqarsimalluni.

- Naatsorsuutigineqarsimavoq nittarsaassisarnerit allat assigalugit ullormut 100-200-t missaanniittunik "nalinginnaasumik" takkuttoqassasoq, ajoraluartimilli ullormut takkuttartut inorujussuarlugit takkuttoqarsimavoq. Taamaammat ilinniagaqartut ilaannik amigaateqarsimavugut, tamannalumi ajuusaarnarpoq. Innovation South Greenlandimit taamaammat aappaagut atorfinnik nittarsaassisoqarnissaanut aqutsisoqatigiinnut ilanngunniarluta qinnuteqarsimavugut, Innovation South Greenlandimi ineriartortitsinermut iunnersorti Ivalo Motzfeldt oqarpoq.

Kalaallit Illui universitetillu pilerisaareqquneqartut

Naalakkersuisut Siulittaasuata Naalakkersuisoqarfianit oqaatigineqarpoq, nittarsaassinermut amerlanerusunik peqataatitsiniartarneq unammillernartuaannarsimasoq. Namminersorlutik Oqartussat ilaatigut peqaasussat amerlanerulersinniarlugit najukkani nittarsaassisarfiit atortarsimavaat aamma akunnittarfinnut taarsiullugit ilinniartoqarfiit nittarsaassinermut atortalersimallugit.

- Århus Universitet, Københavns Universitet aamma Ålborg Universitetscenter attavigineqarsimapput nittarsaassisarnermut ilinniartuutiminnut eqqumaffiginneqquniarlugit. Danmarkimi kalaallit illui ingerlaavartumik piumaffigisarpavut, nittarsaassinissaq pillugu nittartakkamikkut, inuit attaveqaqatigiittarfiisigut kanalillu allat aqqutigalugit paasitsiniaasaqqullugit.

- Danmarkimi kalaallit ilinniagaqartut kattuffiat, Avalak, kiisalu Københavnimi Kalaallit Nunaata sinniisoqarfia attavigisimavavut piumaffigalugillu nittarsaassinissaq pillugu kalaallinut ilinniagaqartunut nittarsaasseqqullugit, Namminersorlutik Oqartussanit ilisimatitsissutigineqarpoq.

Namminersorlutik Oqartussanit ilisimatitsissutigineqarpoq, atorfinnik Danmarkimi ukioq manna nittarsaassinermut 370.000 koruunit atorneqarsimasut.

Powered by Labrador CMS