Namminersorlutik Oqartussat Mittarfeqarfiit akiitsuinik annikilliliisut

Mittarfeqarfiit corona ajornartorsiortitsilinngikkallarmalli aningaasaqarnikkut unammillernartitsitsereerput. Suliffeqarfik ukiuni arlalinni amigartooruteqartarsimavoq, tamannalu politikkerinit ilisimaneqarpoq.

Amigartooruteqartarnerup Namminersorlutik Oqartussat suliffeqarfiutaa illuutiminik atortuminillu aalajangersimasunik aserfallatsaaliugassatigut kinguaattoortissimavaa, politikkerinit isumagineqarsimanngitsunik.

Taamaammat suliffeqarfiup nunatta karsianit 100 millioner koruuninik nusutsisinnaanini tamakkerlugu atorsimava. COVID-19-illu nassatarisaanik suliffeqarfiup aningaasanik atuisinnaatitaanera 200 millioner koruuninut qaffanneqarlutik. Taamatullu inissisimanera pitsaanerulertussatut isikkoqanngikkallartoq, Aningaasaqarnermut Naalakkersuisoq oqarpoq.

- Mittarfeqarfiit ukiut tulliuttut ingerlaneranni akiliisinnaassusaata pitsaanerulernissaa ilimananngilaq, Naalakkersuisoq Vittus Qujaukitsoq Sermitisiaq.AG-mut oqarpoq.

Taamaammat Mittarfeqarfiit suliffeqarfimmik ingerlatsinissamut aningasatigut sinaakkutimik paasinarsisinneqarnissaat pisariaqartippaat, aningaasanut inatsisissatut siunnersuummi allassimavoq.

Tamanna pissutsinik marlunnik pisariaqalersitsivoq:

Siullermik suliffeqarfik nunatta karsianut taarsigassatut katersai, suliffeqarfiup utertillugit akilersinnaaneranik piviusorsiortumik periarfissaqarfiginngisai nammatassaajunnaarsinneqassapput.

Aappassaattut angallannerup nalinginnaasumik ingerlanerani nalinginnaasumillu iluarsartuussisarnermi suliffeqarfik oqimaaqatigiittumik ingerlasinnaanissaanut aningaasaqarnikkut toqqammavissiisoqassaaq.

Siunnersuummi anguniarneqarpoq, ajornartorsiutip siulliup ikiorsiiffigineqarsinnaanera, ukioq manna ilassutitut aningaasaliiffigitinnissamik qinnuteqarnikkut.

Mittarfeqarfiit maannamut ukiut tamaasa aningaasanut inatsimmut ukiumoortumik 10,5 millioner koruuninik tapiissuteqartarsimapput, Mittarfeqarfiit illuutiminik aserfallatsaaliinissamut periarfissaqanngimmat peqatigitillugu nunatta karsianut tapiissuteqartarmat, tamanna maanna unitsinneqarpoq, Vittus Qujaukitsoq 2021-mut aningaasanut inatsisissatut siunnersuut pillugu saqqummiussinermini ilisimatitsivoq.

KAIR-imut kattunneq

Ingerlatseqatigiiffiup aamma nammineq aningaasaatini en milliard koruunit sinnerlugit nalillit annaasimavai, Nuummi Kangerlussuarmilu timmiasartoqarfiit nalingi Kalaallit Airportsimut nuunneqarmata.

Piffissaq ungasinnerusoq eqqarsaatigalugu nunami maani angallannerup aaqqissugaanera tamarmiusoq allanngortinneqassaaq, tamatumalu malitsigisaanik Mittartfeqarfiit Kalaallit Airportsilu aamma kuttutissapput. Isumassarsiaq suliffeqarfimmit namminermit isumassarsiaasoq, Kim Kielsenip siusinnerusukkut eqqissisaassutigisimasaa.

Aningaasaqarnermulli Naalakkersuisup Vittus Qujaukitsup tamanna aqqutissatuaanerarpaa.

- Soorunami timmisartoqarfiit nutaat atuutilerpata, silaannakkut angallassisarnitta aaqqissugaanera tamaat eqqarsaatigeqqittariaqarparput. Soorunami tamatuma qanoq isikkoqarumaarnera pillugu missingiummik suliaqartoqassaaq, immaqa aappaagu aasarpat, taanna oqarpoq.

Nakkutilliisoqarnerussasoq

Mittarfeqarefiit aningaasatigut ajornartorsiornertik pissutigalugu atortumik ajunngitsuujuarnissaannut malinnaajuminaatsitsipput. Taamaammat Danmarkimi oqartussat ingerlatseqatigiiffimmik nakkutiginnipput.

Danmarkimi Angallannermut, Sanaartornermut Illuutinullu Aqutsisoqarfiup (silaannakkut angallannermut oqartussat) ingerlatseqatigiiffiup pigisaasa qanoq innerannut atatillugu Mittarfinnik nakkutilliinini annertusissimavaa. Taamaattumik Mittarfeqarfinni sanaartukkat atortullu pisariaqartumik pitsaassuseqalersinneqanngippata saniatigut allanik peqqussuteqartoqarsinnaanera naatsorsuutigineqarsinnaavoq, Aningaasanut inatsisissatut siunnersuummi ilisimatitsissutigineqarpoq.

Mittarfeqarfiit aningaasaleeqqinnermut atugassaannik kontumut pingaarnermut, 87.73.22 Mittarfeqarfiit, mittarfiit, 10 mio. kr.-nik nuussisoqarpoq. Tamannali suliassaqarfimmi pisariaqartumik pitsaassusissap qulakkeerneqarnissaanut naammannani. Taamaattumik Mittarfeqarfiit silaannakkut angallannermi oqartussanik oqaloqateqarnerisa malitsigisaanik tamatuma aningaasalersornissaa pillugu aalajangiisoqartussaassaaq, taamaalillutik Mittarfeqarfiit atortui Kalaallit Nunaanni silaannakkut angallannermut ingerlatsinikkut isumannaallisaanikkut aarlerinartuussanngillat, siunnersuummi allassimavoq.