Namminersorlutik Oqartussat kommunillu NPK-mut akissuteqartut

Naminnersorlutik Oqartussat kommunillu perorsaasut aningaasarsiassaat pillugit isumaqatiginninniaqataasutut, NPK-p isumaqatiginninniarnerit pillugit ammasumik allagaqaataannut qaqutigoorluinnartumik akissuteqarput.

Ukioq 2020 sukkasuupilussuarmik naajartorpoq. Perorsaasulli kattuffiat NPK aamma Namminersorlutik Oqartussat kommunillu perorsaasut aningaasarsiassaat pillugit isumaqatigiissummik suli atsioqatigiissimanngillat.

Isumaqatiginninniarneq qaammatit arfineq-pingasut maanna ingerlanneqareerpoq, isumaqatiginninniarnerillu kikkunnut tamanut saqqummiunneqarsimallutik. Kingullertigut NPK Aningaasaqarnermut Naalakkersuisumut ammasumik allagaqarnermigut aningaasarsiat malunnaatilimmik qaffanneqarnissaannik piumasaqarpoq.

Namminersorlutik Oqartussat NPK-mut ammasumik akissuteqarnerminni ilisimatitsissutigaat, Namminersorlutik Oqartussat kommunillu procenti qaffariaataasussaq perorsaasunut neqeroorutigisimasartik oqaatigisinnaanagu. Namminersorlutilli Oqartussat ilisimatitsipput, kattuffiit allat piffissami 2020-mit 2024-mut isumaqatigiissuteqarfiusumi agguaqatigiissillugu procentinik 3-nit 5 procentinut qaffaavigineqarsimanerannit annertunerusumik perorsaasunut neqerooruteqarsimallutik.

Tunngaviusumik aningaasarsiat appasittut

NPK-mit neqeroorut naammagineqanngilaq:

- Eqqaamasariaqarpoq perorsaasut tunngaviusumik aningaasarsiaat ima appasitsigimmata, allaat isumaqatiginninniarfigineqartup neqeroorutai iluaqutaangaarnaviaratik. Malunnaatilimmik qaffanneqarnissaat pisariaqartipparput, aningaasatigut malinnaallutalu toqqissilluta sulisinnaaniassagatta, tassa naleqartinneqarnerput tassuuna paasissagatsigu, NPK-p siulittaasua Arnaq Brønlund Sermitsiaq.AG-mut.

Taassuma ilanngullugu oqaaqtigaa, kattuffiit allat sulilerlaanut qaffasinnerusumik aningaasarsiaqartitsisartut, taamalu procenti aalajangersimasoq atorlugu qaffaasoqarnerani amerlanerusunik aningaasannassutaasartoq.

Namminersorlutik Oqartussat 2019-imi Epinionimut misissuisitsisimanerisa takutippaat, perorsaasutut ilinniagaqarluni naammasserlaaq meeqqerivimmi sulisoq, tunngaviusumik 21.000 koruuninik aningaasarsiaqarluni aallartittartoq. Tamanna Arnaq Brønlundimit uppernarsarneqarpoq.

- Aningaasat nammineq atorsinnaasatta pitsaanerulersinneqarnissaannut suli periarfissaqarpoq, Arnaq Brønlund oqarpoq, assersuutigalugulu oqaatigalugu meeqqat atuarfianni ilinniartitsisutut naammasserlaaq 27.200 koruuninik aningaasarsiaqartartoq.

Perorsaasut annertuumik unammilligassaqartut

Namminersorlutik Oqartussat kommunillu takisuumik oqaaseqaateqarnerminni nassuiaatigaat, perorsaasit piumasaqaataat naammassiniarlugit annertuumik takutitsereerlutik. Taakkumi naapertorlugit, perorsaasut 2008-miilli aningaasarsiamikkut 40 procentit missaannik qaffaavigineqarsimapput. Ukioq manna aningaasarsianik qaffaasoqarpat nuna piitsuuneruliinnassasoq oqartussanit oqaatigineqarpoq.

- Pisortat suliffeqarfiinik aqunneeruttumik aningaasarsiatigut ineriartulerneq ataatsimut isigalugu atugarissaarnerulernermik kinguneqarsinnaanngilaq, akerlianilli nunamik piitsuunerulersitsisumik akit akisarsiallu qaffakkiartupiluulissapput. Ilimagisallu akimorlugit taamaattoqalissappat, tamanna tamatta karsitsinnut Nunatta Karsianut kommunillu karsiinut tamatta akileraaffigisatsinnut pitsaanngitsumik kinguneqartitsissaaq. Taamaaliorneq ungasinnerusoq isigalugu aningaasarsiornitsinnik annertuumik innarliissaaq, Namminersorlutik Oqartussat kommnillu allapput.

- Perorsaasut aningaasarsiaannik qaffaanerup kinguneranik nunap piitsuunerulernissaa paasisinnaanngilara. Oqarsinnaagunik timmisartoqarfinnut anginerusunut nuna akissaqartoq, taava sooq perorsaasut aningaasarsiaqarnerulaalernissaannut akissaqassanngillat, NPK-p siulittaasua Arnaq Brønlund aperivoq.

Namminersorlutik Oqartussat kommunillu tallimaasut borgmesteriisa akissuteqaamminni naggasiullugu oqaatigaaty, perorsaasut inuiaqatigiinni pingaaruteqarnerat paasilluarsinnaallukku:

- Taamaammallu isumaqatiginninniarnerni ataatsimoorluta illuatungeriilluta akuersaarsinnaasatsinnik angusaqarnissarput ilungersorluta anguniarparput. Neriuppugullu tassani NPK-p isumaqatigigaatigut, Aningaasaqarnermut Naalakkersuisoq Vittus Qujaukitsoq nunamilu borgmesterit tallimat ataatsimoorlutik oqaaseqarput.

Powered by Labrador CMS