Skip to main content

Namminersorlutik Oqartussat KNR isiginnaagassiamik aalajangersimasumik aallakaatitseqqujunnaarpaa

KNR-ip nungusaataanngitsumik qaleralinniartarnissaq pillugu naatsumik filmiliaq Namminersorlutik Oqartussat aallakaatittarunnaaqqummassuk aallakaatitarunnaarsimavaa. Aallakaatitseqqusinnginnermut tunngavilersuutigineqarsimavoq filmi politikkikkut sunniiniutaasoq, tamannalu inatsimmut akerliusoq. NGO-t filmiliorsimasut ombudsmandimut suliamik misissueqqusisimapput.

Oceans North KNR-imit nalunaarfigineqarsimavoq, nungusaataanngitsumik qaleralinniartarnissaq pillugu filmiliaata takutinneqartarnera inatsimmik unioqqutitsinerusoq, taamalu KNR-ikkut takuteqqinneqarsinnaanngitsoq. Tamanna pivoq filmip 2021-mi februaarip aallaqqaataaniit 19-iat tikillugu ullut tamaasa takutinneqartareersoq.

Oceans Northimi pisortap Søren Stach Nielsenip suliap taamatut pisoqarnera paasiuminaatsippaa.

- Piviusut tunngavigalugit politikki ilisimatusarnermik nunallu siunissami pisariaqartitaanik eqqarsaatiginnittoq akerlilerneqarsinnaanngilaq. Ingerlaannartumik angusaqarnissaq pinnagu pisariaqartinneqartumilli oqaloqatigiittoqarnissaa aallartinniarsarivarput, taanna Sermitsiaq.AG-mut oqarpoq.

KNR-imit ilisimatitsissutigineqarpoq, isiginnaartartunit naammagittaalliortoqarmat filmip pineqartup aallakaatinneqartarnera inatsimmik unioqqutitsinersoq paasiniarlugu Namminersorlutik Oqartussanut saaffiginnissimallutik.

”Oceans Northip paasititsiniaalluni filmiliaa KNR-p innuttaasunut paasissutissiisarfiatigut ajoraluartumik aallakaateqqissinnaanagu nalunaarfigisariaqarpakkit”

- Politikkimut attuumassuteqanngitsutut isigingatsigu aallakaatittarsimavarput. Isumaqarsimavugut inatsimmut akerliunngitsoq, KNR-imi pisortaq Karl Henrik Simonsen Sermitsiaq.AG-mut oqarpoq.  

Radiumi tv-milu pilerisaarutit aallakaatitassianillu aningaasalersuisarnerit pillugit Namminersornerullutik Oqartussat nalunaarutaat

§ 17. Upperisarsiornermik suliaqartut, politikkikkut partiit, kattusseqatigiit, kattuffiit kisimiillutillu qinigassanngortittut pillugit pilerisaarutinik tv-mi aallakaatitsisoqassanngilaq, taamaattorli tak. imm. 3.
Imm. 2. Tv-mi reklaminut ilanngunneqartassanngillat upperisarsionermut politikkimullu tunngasutigut isummat, taamaattorli tak. imm. 3.
Imm. 3. Imm. 1-imi amma imm. 2-mi aalajangersagaq qinersinerit pillugit aallakaatitanik taagorneqartunik, tassa qinersineq pillugu aallakaatitaq ilanngussanik politikkikkut partiimit aallakaatitassiarineqarsimasunik akilerneqartunillu imaqarpat, aallakaatitsinissamut akornutaanngilaq.

Namminersorlutik Oqartussat filmi politikkimut attuumassuteqarneraraat

Namminersorlutilli Oqartussat KNR-imut akissuteqarnerminni isumaqarput, filmi radiumi tv-milu pilerisaarutit aallakaatiassianillu aningaasalersuisarneq pillugu inatsimmut akerliusoq. Namminersorlutik Oqartussat akissuteqaammini ilaatigut allapput:

-  Pilerisaarummi pineqartumi isiginnaartartunut eqqumaffigeqquneqarpoq, piffissaq ungasinnerusoq eqqarsaatigalugu nungusaataanngitsumik aalisarnermi politikki atuutsinneqartoq. Peqatigitillugu isiginnaartartut kaammattorneqarput, aalisarnermi politikkimi immikkuualuttut kinguneqaataasinnaasullu eqqarsaatigalugit aalisagaqassuseq pillugu apeqqummut isummissasut.

- Tamanna tunngavigalugu qularutissaanngilaq, nungusaataanngitsumik aalisarnermi politikkeqarnissap pingaaruteqarneranik oqariartuuteqarnermi politikkikkut isummanik paasititsiniaaneq siammarterinerlu pineqartut. Allatut oqaatigalugu, takutitassiami aalajangersimasumik aalisarnermi politikkeqarnermut isummamik siuarsaallunilu tapersersuisoqarnissaa pillugit paasititsiniaasoqarlunilu tapersersuisussarsiortoqarpoq. Taamaammat ilanngutassiaq tv-kkut aallakaatinneqassappat inatsimmut unioqqutitsinerussaaq, Namminersorlutik Oqartussat allapput. 

Kukkunerusoq neriuutigineqartoq

Oceans North eqqartuussissuserisortik aqqutigalugu ombudsmandimut naammagittaalliuuteqarsimavoq, neriuutigalugu kukkusumik naliliisoqarsimasoq.

- Paasititsiniaanerit taamatut ittut politikkikkut sunniiniarnerusutut nalilerneqartassappata, taava innuttaasunut inuiaqatigiinnullu siunissami paasititsiniaasarnissat kingunerluuteqarujussuartassapput, eqqartuussissuserisoq Jonas Christoffersen oqarpoq.

Oceans Northip ombudsmandimut naammagittaalliuuteqarnermini oqaatigaa, Naalakkersuisut peqqusinerat KNR-illu aalajangernera Inatsisartut Inatsisaanut Europamilu Inuit Pisinnaatitaaffiinik isumaqatigiissummut akerliullutik kiffaanngissuseqarluni oqaaseqarsinnaanermut atatillugu unioqqutitsinerusut, naligiissitsinerunngitsut aamma siunertamut naapertuutinngitsut.

- Oceans North Greenlandimit aammat isumaqarput, Naalakkersuisut taamatut peqquseriasaarnerat KNR-illu aalajangernera, Naalakkersuisut Oceans North Greenlandip KNR aqqutigalugu naatsumik filmiliaminik takutitsisinnaaneranik unitsitsinermikkut politikkikkut anguniagaqartutut isikkoqarsinnaasut, taamalu naalakkersuinermut attuumassuteqanngitsumik tunngaveqarnermik avaqqutaarinnillutik Naalakkersuisut aalajangernerat malinneqartussatut peqqussutigisimagaat.

Nungusaataanngitsumitk qaleralinniarneq pillugut naatsumik filmiliaq uani takuuk:

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER