mittarfiit

Namminersorlutik Oqartussat kingornussassanik tunisinissamut piareersimasut

Ilulissani, Nuummi aamma Qaqortumi mittarfiit pingasut nutaat aningaasalerneqarnissaat piviusunngortinniarlugu, Naalakkersuisut 2018-imi aningaasanut inatsimmi pisariaqartillugu aktiaatinik tunisaqarsinnaanissaq kissaatigaat.

OBS: Nal. 15.29 ingerlatseqatigiiffiit aqqinut tunngatillugu immikkoortoq siulleq uani ataaniittoq iluarsineqarpoq, aaqq.

Namminersorlutik Oqartussat aktiaatit suut tunisinnaassaneraat aningaasanut inatsimmut oqaaseqaatini takuneqarsinnaanngilaq, kisianni Namminersorlutik Oqartussat ingerlatseqatigiiffinni tamakkiisumik pigisamini nalilinnik tunisaqarsinnaavoq, soorlu Tele-Post imaluunniit Royal Greenlandimit.

Aningaasaatit 2,1 milliardit koruunit amigaatigineqartut
Kalaallit Airportsip (KA) aningaasat katillugit 2,1 milliardit koruuniunissaat ilimagineqarpoq. Sinneri nunani allanit aningaasaliisartunit tarsigassarsiarineqarnerisigut nassaarineqassapput, tamanna 2018-imut aningaasanut inatsisissami atuarneqarsinnaavoq, taanna pingasunngornermi ualikkut isumaqatigiissutigineqarpoq.

Kalaallit Airportsip aningaasat 2,0 milliardit koruunit atorsinnaanissaanut Namminersorlutik Oqartussat qularnaveeqqusiisussapput. Nunap karsianit taarsigassarsiat KA-mut tunniunneqarnissaat periarfissaassaaq.

2 milliardit koruunit qanoq pissarsiarineqarnissaannut allattorsimaffik takillunilu immikkoortunut arlalinnut iluarsaassaavoq, tamanna aningaasanut inatsisissamut siunnersuut 2018-imi aggustimi ukiormanna tamanut saqqummiunneqarmat paasineqarpoq.

Mobilinik atuisut suli akiliissapput
Tele-Post ukiuni pingasuni tulliuttuni katillugu 250 millionit koruuninik tunniussaqassaaq.

Air Greenland akerlianik suliniummut sinneqartoorutinik tunniussaqarsinnaanera naatsorsuutigineqassanngitsoq nassuerutigineqarpoq, mittarfiit nutaat pilersitaannik ingerlatseqatigiiffiup timmisartumik angallannermut attaveqaatinut annertuumik aningaasaliissuteqarnera pissutigalugu.

Royal Greenland sinneqartoorutinik tunniussissaaq
Nunap karsianut aningaasaliissutissat Royal Greenlandimut taamaattumik sangutinneqarput, taanna 2017-imi sinneqartoorutinik 70 millionit koruuninik tunniussaqassaaq. Suliffeqarfissuaq siornatigut mittarfiliornissamut suliniuterujussuarmut tapiisussatut taaneqarnikuunngilaq.

- Namminersorlutik Oqartussat 2017-imi aktiaateqarluni ingerlatseqatigiiffinnit Namminersorlutik Oqartussanit tamakkiisumik ilaannakortumilluunniit pigineqartunit immikkut ittumik iluanaarutinik pissarsitillugit,iluanaarutit taakku tunngavigalugit katillugit 100 mio. kr. tikillugit Kalaallit Airports AS/-imut aningaasaliissuteqarnissamut Naalakkersuisut piginnaatinneqarput. Aappaattut aktiaatinik 100 mio. kr.-it tikillugit nalilinnik tunisinissamut tunisinermillu tamanna iluanaarutinik Kalaallit Airports A/S-imut aningaasaliinissamut Naalakkersuisut piginnaatinneqarput, tamanna allaqqavoq.

Nunap karsiani sinneqartoorutit
Nunap karsianit sinneqartoorutit ukiunut 2016-imit 2019 ilanngullugu aningaasaliinermut tapeeqataasinnaanerat naatsorsuutigineqarpoq, kisianni peqqutissaqarluartumik aningaasartaat allanneqanngillat.

Soraarnerussutisianut sillimasiissutinit isertitaneersut aamma Kalaallit Airportsip (KA) aningaasaateqarfianut nuunneqassapput.

Akileraarutinit iluanaarutit nunanit allanit mittarfiliorlutik suliartortunit pissarsiarineqartut aamma KA-p aningaasaateqarfianukassapput, peqatigisaanik ingerlatseqatigiiffik taarsigassarsinermut naqissusiinermut akitsuuteqartinneqassanngilaq. Assersuutigalugu 1,6 milliardit koruuninik taarsigassarsineq KA-mut 24 millionit koruuninik akeqassagaluarpoq.

Powered by Labrador CMS