Namminersorlutik Oqartussat ingerlatseqatigiiffiat amigartoorujussuartoq
Greenland Oil Spill Response A/S naatsorsuutini amigartoorujussuaqqasut saqqummiuppai, ingerlatseqatigiiffiullu ingerlaannarsinnaanera aqutsisut apeqquserpaat.
Kaaviiaartitanit 1 million koruuniusunit ukioq manna angusaq 3 millionit koruunit sinnerlugit amigartoorfiuvoq, tamannalu ukiup siulianit millionimik annertuneruvoq.
Namminersorlutik Oqartussat suliffeqarfiutaanni Greenland Oil Spill Response A/S-imi ataatsimeersuartoqarpoq, taanna uuliakoortoqarnissaanut upalungaarsimanermik, - akiuinermik aamma avatangiisinik saliinermik suliaqartuuvoq.
”Naatsorsuutigisatut”
2018-imut naatsorsuutit naammaginanngillat, aqutsisut nalunaarumminni oqaatigaat, kisianni taamatut oqarnermut atatillugu aamma allapput, ”maanna ingerlatseqatigiiffiup sinaakkutit atugai tunngavigalugit tamanna naatsorsuutigineqarpoq, Kalaallit Nunaannilu kulbrintenik misissuisoqarnissaanut soqutiginnittoqanngimmat”.
Tassa 2018-imi kisermaassilluni akuerississutit marluinnaasimapput, kiisalu ilaasortat tallimaallutik.
- 2018-imi ingerlatseqatigiiffiup ingerlaannarnissaanut isumannaarinninnissaq sulissutigineqaqqinnikuuvoq, ilaatigut Statoilimit aningaasat suliniutinut aningaasaliissutinut 1 mio. USD-nik nuussisoqarneratigut. Tamanna ajoraluartumik Kalaallit Nunaanni qinersisoqarnera pillugu kinguaattoorpoq, kisianni novembarip qiteqqunnerani 2018-imi aningaasaliissutigineqartussanit pingasuusunit siulleq DKK 2.077.000 missaanniittut kontotsinnut ikineqarput. Sinnerit marluk 2019-imi nuunneqassapput, aqutsisut nalunaarutaanni tamanna atuarneqarsinnaavoq.
Illersornissamut isumaqatigiissut
Danskit Illersornissaqarfiata isumaqatigiissusiorfigineqarnissaa aamma tunaartarineqartoq oqaatigineqarpoq, tamannalu suli iluatsinneqarsimanngilaq.
Sila aamma aningaasaqarniarnerup killeqarnera pissutigalugit 2018-imi sungiusarneq pilersaarutaasoq taamaatiinnarneqartariaqarsimavoq, taanna pilersaarut malillugu maajimi pisussaavoq.
Aqutsisut isertuutinngilaa ”ingerlatseqatigiiffik niuernermik tunngaveqarluni ingerlanneqarnissaa ajornakusoortorujussuusinnaasoq”. Tamannalu tunngavigalugu Illersornissaqarfiup isumaqatigiissusiorfigineqarnissaa ingerlatseqatigiiffiup ingerlatiinnarnissaanut aalajangiisuussaaq.
Ukiumut nalunaarutip ”ingerlatsiinnarnissaq tunngavigalugu” tunniunneqarnissaa illersorneqarsinnaasoq, siulersuisut ilisimatitsissutigaat.
Pisortaq nutaaq
Ingerlatseqatigiiffik februaarimi nutaamik pisortaqartaarpoq, tassani Klaus Kuch Jensenip pisortaq Steen Ove Hansen kingoraarpaa. 32-nik ukiulik Klaus Kuch Jensen Aatsitsassarsiornermik Aqutsisoqarfimmi akuersissuteqarnermut immikkoortortami pisortatut atorfimmit aggerpoq. Taassuma Internationale Udviklingsstudier kandidatitut ilinniagaraa.
Siulersuisut tassaapput, siulittaasoq Steen Ove Hansen aamma Hanne Berthels kiisalu Oddbjørg Varhaug Greiner.