Namminersorlutik Oqartussat ineqarnermut politikkiminnik allannguisut

Naalakkersuisut februaarip arfernani ataatsimiinnermi aalajangeriasaarput, Naalakkersuinikkut Ataqatigiissaarisoqatigiinni Namminersorlutik Oqartussat kommunillu ukiuni sisamani isumaqatiginninniutigisaannik allannguiniarlutik.

Februaarip arfernani ataatsimiinnermit imaqarniliami erseqqissaassutigineqarpoq, Naalakkersuiut akuerisimagaat, ”ineqarnermut immikkoortup siunissami aaqqissuunnissaanut, ilanngussami takuneqarsinnaasumi Ineqarnermut Pilersaarusiami periarfissaq 1 aallaavigalugu, sulinerup ingerlanissaa akuersissutigineqassasoq”.

Sermitsiaq.AG-mit ineqarnermut pilersaarut, ”Periarfissaq 1”-mut tunngaviusoq itisilerlugu nassuiaatitaqartoq pissarsiarineqarsimavoq.

Eqiterussineq

Maanna paasinarsivoq, Namminersorlutik Oqartussat inissiaatiminnik kommuninut ataasiakkaanut tunniussinatik eqiterussiniartut.

Periarfissaq 1-imi allakkiamut qulequtsiunneqarsimavoq: Pisortat ataatsimut inissiaateqarfiat, kommunit Namminersorlutillu Oqartussat inissiaataat ineqarnermut immikkoorortamut ataatsimoortillugit, tassani Illuut kisiat minillugu.

-Taamatut aaqqissuussineq arlalitsigut iluaqutitaqassaaq, allakkiami immikkoortunik ukunannga tulleriiaarisumi allassimavoq:

Aningaasat ataatsimoortinneqarneranni taarsigassarsinissamut qularnaveeqqusiinikkut taarsigassarsinissamut periarfissaqarluarneq

Immikkoortortap ataatsip allaffissornermik tamarmiusumik isumaginninnieratigut annertuumik ingerlatsinermi iluanaarutissaqarluarpoq. Ullumikkut INI-p aamma Iseritsip ineqarnermik aqutsinerannut sanilliullugu ajornaannerusumik akikinnerusumillu aaqqiissuteqartoqarsinnaavoq.

Inissiaatileqatigiiffiit (maanna atuuttut) akornanni nalimmassaasoqarsinnaalissaaq, tassa siunertamut naapertuunnerpaamik pisaraqartitsiffiunerpaallu isumagineqarsinnaanngussallutik. Eqaalluinnartumik tamanna aaqqiineruvoq.

Periarfissaq 1-imi unammilligassatut uku taaneqarput:

Aningaasalersuinissaq pillugu kommunit Namminersorlutillu Oqartussat isumaqagtigiissuteqassapput.

Siunissami aserfallatsaaliuinissamut kiisalu najukkani aserfallatsaaliinissamut pisariaqartitat assigiinngitsorpassuit eqqarsaatigalugit suliassarpassuaqarpoq. (Tunngaviit arlallit immikkoortullu anguniagaat tunngavigalugit inatsisitigut aaqqiissuteqartoqartariaqarpoq).

Kommunit suli peqataatinneqassasut

Februaarip arfernani ataatsimiinneri Naalakkersuisut aamma aalajangiuppaat, ”kommunit suliamut suli peqataatinneqassaasut, Naalakkersuinikkut Ataqatigiissaarisoqatigiit taamaalillutik tullissaanik ataatsimiinnerminni aaqqissutissarsiorsinnaaqqullugit”. Imqarniliami aamma takuneqarsinnaavoq, ”Ineqarnermut ataatsimut pilersaarut akuerineqarlunilu piaarnerpaamik aallatinneqassasoq”.

Naalakkersuinikkut Ataqatigiissaarisoqatigiit aqangu Kangerlussuarmi ataatsimiissapput, tassanilu kommunit aatsaavissuaq peqatigiillutik ineqarnermut politikkimut tunngatillugu oqaatsit nutaat isummerfigisussanngorpaat.