Namminersorlutik Oqartussat ilinniartut misilitsinnissaannik piareersaateqartut

Meeqqat atuarfiini atuartut amerlanerpaartaasa angerlarsimaffimmi ilinniartinneqarneranni, aamma ilinniarnertuunngorniarfimmi ilisimatusarfimmilu ilinniartut internetsikkut pikkorissartinneqarlutillu ilinniartinneqarneranni, Namminersorlutik Oqartussat misilitsinnissanut sukkasuumik qalliartortunut pilersaarusiorlutik suliaqarput.

Ilinniartitaanermut, Kultureqarnermut Ilageeqarnermullu Naalakkersuisoqarfik ajornartoornermi ilinniartitsinissaq pillugu nalunaarutissamut missingiummik suliaqarpoq. Nalunaarutissaq taanna nutaaq aqqutigalugu, coronap atuunneqara pissutigalugu pisariaqalissappt, piffissami aggersumik misilitsinnissat pillugit malittarisassat avaqqunneqarsinnaalerlutillu ilaneqarsinnaalissapput. Ilinniartitaanermut, Kultureqarnermut Ilageeqarnermullu Naalakkersuisoqarfik Sermitsiaq.AG-mut ilisimatitsivoq.

- Maannakkorpiaq oqaatigissallugu siusippallaarpoq, misilitsitsinerit nalinginnaasumik ingerlanneqassanersut imaluunniit allatut ingerlanneqassanersut kinguartinneqassanersulluunniit. Piffissami aggersumi susoqassanersoq aamma corona qanoq ineriartussanersoq naluarput, Naalakkersuisoqarfimmit oqaatigineqarpoq.

Ilinniartoqarfinni aaqqiissutissat assigiinngitsut

Inatsisartut pingasunngormat inatsimmik nutaamik akuersissuteqarnerisigut, susassaqarfiup inatsisiliuunneqarnissaa periarfissaalerpoq, misilitsinnissallu ilinniartoqarfiit ataasiakkaat pisariaqartitaannut naleqqussarneqarsinnaalerlutik.

- Ilinniartoqarfiit assigiinngitsut assigiinngitsunik suleriaaseqarmata, ilinniartitsisarmata periarfissaqarmatalu, ilinniartoqarfiit ataasiakkaat inissisimanerat isummerfigineqassaaq, Naalakkersuisoqarfimmit ilisimatitsissutigineqarpoq.

Naalakkersuisut inatsit nutaaq aqqutigalugu ajornartoornermi ilinniartitsinisssaq pillugu nalunaarummik akuersissuteqarsinnaapput, nalunaarut ilinniartoqarfiit piffissami aggersumi atugassarititassaannik qulakkeerinnissaaq. Nalunaarut aqqutigalugu qulakkeerneqassaaq, meeqqat inuusuttullu coronamik pissuteqartumik manna ilinniartitaanikkut inissisimanermik pitsaanerpaamik qaangiinissaannut, Naalakkersuisoqarfik erseqqissaavoq:

- Ilinniarnermi ingerlatassa sapinngisamik amerlanerpaat pilersaarutaasutut ingerlatiinnarneqarnissaat naammassineqarsnissaallu salliutinneqarpoq, taamaalilluni tamatuma atuartunut ilinniagaqartunullu ajoqusiisinnaanera minnerpaamiitinniarneqarluni, Naalakkersuisoqarfik ilisimatitsivoq.

Powered by Labrador CMS