Namminersorlutik Oqartussat Danmarkimiittut tamaasa angerlartinniarpaat
Namminersorlutik Oqartussat januaarip aqqaneq-aappaata tungaanut nuna tikinniartunut matoriarlugu, isummatik allanngortillugit Danmarkimiittut tamaasa piaarnerpaamik angerlartikkusulersimavaat. Nunap suli matoqqanerulernissaa aamma Tuluit Nunaanni Corona alla nutaaq nunatsinnut anngutsaaliniarneqarnissaa tunngavigineqarlutik.
Europami pissutsit ilungersunarsilluinnarmata Namminersorlutik Oqartussat inuit Danmakimi juullisioreerlutik angerlarfissaannik kinguartitsinissamik siunnerfeqarsimaneq allanngortittariaqarsimavaaat.
Taamaammat Kalaallit Nunaanni inuit nalunaarsorsimaffianni allassimasut tamarmik piaarnerpaamik angerlartinneqassapput, nunap matuneqarnerani pisortat angallanneqarsinnaanerat kisimi februaari tikillugu minnerpaamillu februaari tamakkerlugu sivitsorneqarsinnaalluni.
Tassa sapaatip akunnerani matumani pilersaarutaasutut aallarfissat ingerlanneqareerpata, ataasinngorpamiit Danmarkiminngaanniit timmisartuussinerit amerlingaatsiarneqassapput. Sapaatip akunnerisa marluk ingerlaneranni Danmarkimiit Kalaallit Nunaannut aqqanileriarluni timmisartuussisoqassaaq.
Nunatta Nakorsaanerata Henrik L. Hansenip ilisimatitsissutigaa, Danmarkimi oqartussanit naatsorsuutigineqartoq, Tuluit NUnaanni corona alla tuniluutianerusoq pissutigalugu januaarip naalernerani Danmarkimi tuniluuttoqarnerulernissaa.
Taamaammat angalasussat sapaatip akunnerani kingullermi ilisimatinneqartut, Kalaallit Nunaannut angerlarnissaat januaarip aqqaneq-aappaata kingornanut kinguartinneqarsimasoq, piaarnerpaamik angerlartinneqassasut, coronamut atatillugu sulisoqatigiit ilisimatitsipput.
Nunamut tikitsinnani coronamik tunillatsissimannginnermut uppernarsaat suli takutinneqartassaaq. Misissortissimanermi uppernarsaat sivisunerpaamik ullunik pingasunik pisoqaassuseqassaaq, aamma tikittut ulluni tallimani suli angerlarsimaannartassapput kiisalu innuttaasunut akuliuteqqinnginnermi misissorteqqittoqartassalluni.
Oqartussat kisimik angallanneqartassasut
Januaarip 22-aniit februaari tamaat ilanngullugu pisariaqartitsinerinnarmi pisortat kisimik angallanneqartassapput.
Tunngaviatigut Kalaallit Nunaanniit aallarnissamut suli periarfissaqassaaq, kisianni Kalaallit Nunaannut uteqqissinnaaneq qularnaarneqarsinnaanngilaq.
Januaarip 22-ata kingorna nunamut isernissamut akuerineqassagaanni, ilaqutarisani qaninnerpaani perulunnartumik napparsimasoqarnera toqusoqarneralu piumasaqaatit naammassineqartussat ilagissavaat.
Coronamut atatillugu sulisoqatigiit Danmarkimi ilinniagaqartunut efterskolenilu atuartunut innersuussutigaa Danmarkigiinnarnissaat. Efterskoleni atuartunut ukiukinnerusunut angajoqqaat ernummateqartut apeqqutissaqarunik ilinniartitaanermut aqutsisoqarfimmut saaffiginneqquneqarput.
Corona tuniluutianerusoq takkuteriaannaasoq
Tuluit Nunaanni coronavirusi alla atuutilersimasoq virusimut siullermut sanilliulluni tuniluutianerujussuuvoq, sapaatillu akunnerisa sisamat kingullit inerlaneranni taassuma Danmarkimit tuniluunnera sisamariaatinngorsimavoq.
- Coronavirusi taanna allaasoq Danmarkimi tuniluupiloorpoq, taassumalu maanga nunamut anngunnissaa kissaatiginngilluinnarparput. Taamaammat maanna isumaqarpugut, inuttaasutta piaarnerpaamik angerlartinneqarnissaat qularnaannerpaasoq, tassa angerlartussat uluit Nunaanni virusimik allaanerusumik tunillatsissinnaanera sapinngisamik minnerpaaffianiitinniarlugu, Nunatta Nakorsaanera Henrik L. Hansen oqarpoq.
Nuatta Nakorsaanerata taamaammat kalaallit Danmarkimiittut kaammattorpai, sapinngisaminnik mattussimaniaqqullugit, taamaaliornikkummi Kalaallit Nunaanni tuniluuttoqalersinnaanera pinngitsoortinneqassammat.
Peqatigitillugu nunatsinnut ikittussat kaammattorneqarput, tikinnerminni angerlarsimaannarnissartik eqqummaariffigissagaat.
Coronamut atatillugu sulisoqatigiit inuit Kalaallit Nunaannut bilitsillit bilitsiisa siuartinneqarnissaat pillugu attaveqarfigisarlugit suliaqaleruttorput.
Inuit februaarip qaammataa Kalaallit Nunaannukarnissamut bilitsillit, bilitsinut akiliutigisimasaat ingerlaannartumik utertinneqassapput, Peqqissutsimut Naalakkersuisoq Anna Wangenheim ilisimatitsivoq. Danmarkimiit Kalaallit Nunaannut aqqut februaarip naanerata tungaanut angalasunut matoqqassaaq.