Namminersorlutik Oqartussat Arctic Prime Fisheriesimut mianersoqqusisut
Aalisarnermut Naalakkersuisoqarfiup Kujataani aalisariutileqatigiiffik Arctic Prime Fisheries mianersoqqusariaqarsimavaa, oqarfigalugulu aalisarsinnaanermut akuersissummi pissarsiarisimasamini piumasaqaatit unioqqutikkunigit politiinut unnerluutigineqarsinnaasoq.
Naalakkersuisut Arctic Prime Fisheriesip aalisarsinnaanermut akuersissutip atorneqarnissaanut malittarisassanik sunik malinninnissaanut isumartik allanngortissimanngilaat.
Naalakkersuisut decembarip 17-iani piumasaqaatigaat ingerlatseqatigiiffik nunanut allanut tunisitinnani, ”Arctic Prime Fisheriesip Kalaallit Nunaanni tunisinissamut pisussaaffimi 50 procentii tuneqqaartassagai”.
Kujataani ingerlatseqatigiiffiup taamatut aalajangiisoqarsimanera naammagittaalliuutigisimavaa, januaarilli 28-ani suliaq Naalakkersuisut aalajangiussaminnik attassiinnartut suliassareqqilersimavaat.
Islandimut tulattoq
Aalisarnermut Naalakkersuisoqarfiup tamatuma kingorna paasisimavaa, Arctic Prime Fisheries Islandimut ingerlaartoq imaluunniit Islandimi umiarsualivimmut tulareersimasoq.
Naalakkersuisoqarfik ingerlatseqatigiiffiup akuersissummi piumasaqaatinik unioqqutitsisimanera pillugu politiinut unnerluutiginnissimava?
- Naamik, unnerluutiginninngilagut, Naalakkersuisoqarfimmi pisortaq Jørgen Isak Olsen oqarpoq, nangillunilu:
- Akerlianik ingerlatseqatigiiffimmut nalunaarutigisimavarput, aalisarsinnaanermut akuersissummi piumasaqaatinik unioqqutitsilluni Islandimi aalisakkanit tunissaqassappat sunik kinguneqartitsisoqassanersoq, Naalakkersuisoqarfimmi pisortaq Jørgen Isak Olsen Sermitsiaq.AG-mut ilisimatitsivoq.