Namminersorlutik Oqartussat aningaasarsiassat pillugit isumaqatigissummik malinninngitsut
Ilinniartitsisut Atorfillit Kattuffiannut (AK) ilaasortaasut januaarip aallaqqaataanit aallartittumik qaammammut aningaasarsiaat 8.000 koruuninik qaffanneqartussaagaluarput. Inuussutissarsiutinut ilinniarfinni ilinniartitsisut aningaasarsiaasa qaffaassutissat Namminersorlutik Oqartussanit suli tunniunneqarsimanngillat.
AK-mi siulittaasup Dina Olsenip, Namminersorlutik Oqartussat piffissaq suliffiusussaq pillugu isumaqatigiissummut malinninnginnerat ”akuersaarneqarsinnaanngitsutut” oqaatigaa.
AK Namminersorlutillu Oqartussat 2019-imi oktoberip 19-iani inuussutissarsiutinut ilinniarfinni piffissaq suliffiusartussaq pillugu isumaqatigiissuteqarput, isumaqatigiissut malillugu ilinniartitsisut aningaasarsiaat qaammammut 8.000 koruuninik qaffanneqartussaapput, taakkulu 2020-mi januaarip naanerani tunniunneqartussaagaluarput, kiisalu ilinniartitsisut siumoortumik aningaasarsisartut siorna decemberip naanerani aningaasarsiat qaffaassutaannik pissarsisimasussaangaluarlutik.
Ernumanartoq
- Aningaasaqarnermut Sulisoqarnermullu Aqutsisoqarfiup (ASA) isumaqatigiissummik malinnissinnaannginnera ilaasortatsinnut kinguneqartariaqanngikkaluarpoq. Piumasarisimavarput aningaasarsianut aaqqiissutit piaarnerpaamik tunniunneqassasut, ASA-li mannamut aningaasarsiassanik tunniussisinnaasimanngilaq, Dina Olsen Sermitsiaq.AG-mut ilisimatitsivoq.
- Sulisut isumaqatigiissutit malinneqarnissaannik tatiginnikkunnaartarnerat ernumanarpoq. Sulili ernumanarneruvoq, ASA-p arriippallaamik sullissiniartarnerata kinguneranik ilaasortatta akilisiinnaassusaasa ajornerulersinneqarsinnaanerat, Dina Olsen, ilaasortaminit ajornartorsiummik kattummiissorinnittunit isornartorsiorneqarsimasoq oqarpoq.
Piffissaq suliffiusussaq Naalakkersuisut. AK-p ASG-illu 2019-imi oktoberip qaammataani isumaqatigiissutigaat.
Sulisut sinniisaat: Aningaasarpassuupput
AK-mi siulittaasoq ilinniartitsisut aningaasarsiaannut aaqqiissutissap inissinneqarnissaata tungaanut ilinniartitsisut illersorlugit sorsuuteqarniarpoq, erseqqissaatigineqarporlu aningaasarsiat qaffaassutaasa tunniunniarneqarnerisa kinguaattoornerat pissutigalugu aningaasat ernialelugit tunniunneqarnissaat naatsorsuutigineqartoq.
Hanseeraq Kleemann, KTI Nuummi AK-mi ilaasortanut sinniisaasoq oqarpoq:
- 8.000 koruunit aningaasarpassuupput. Ilinniartitsisuusugut ineqarnermut taarsigassarsiaqarpugut, biilinut taarsigassarsiaqarpugut ineqarnermullu akiliuteqartarluta. Aningaasarsiassallu eqqortut pissarsiarinngikkutsigit qaammammut aalajangersimasumik aningaasartuutaasartut akileruminaatsilesinnaavavut, KTI Nuummi sulisut sinniisaat Hanseeraq Kleemann, sulisitsisuminut tatiginnikkunnaalersoq oqarpoq.