Namminersorlutik Oqartussat akuersissutinik utertitseqqusisut
Kalaallit Nunaannut ikinnermi angerlarsimaannarfissap nalaani sulinissamut akuersissutit tamarmik marlunngormat uterteqquneqarput. Ilaatigut peqqinnissaqarfimmi sulisut allat sanasullu suliffeqarfinni mattusimaninginnissamut akuersissummik pissarsisimasuni taamaallaat sulisut akuersissummik tunineqarsimapput.
Namminersorlutik Oqartussat coronamut atatillugu allattoqarfiata Kalaallit Nunaannut ikinnermi angerlarsimaannarfissap nalaani sulinissamut akuersissutit tamaasa 2021-mi januaarip aallaqqaataani uterteqquai. Tamatumunnga pissutaavoq, Danmarkimi nunarsuullu sinnerani tuniluunnerup annertusisartuinnarnera, Namminersorlutik Oqartussat tusagassiorfinnut nalunaaruteqarlutik ilisimatitsipput.
Kalaallit Nunaanni coronamut atatillugu allattoqarfiup nalilersimavaa, angerlarsimaannannginnissamut akuersissutit tunniunneqartarpata tuniluuttoqalersinnaaneranut aarlerinartoq annertuallaartoq. Tamatuma aamma kingunerisinnaammagu, akiuussutissalersuinerup naammassiniarnerata ajornarsisinnaanera.
Ilisimatitsissutigineqarpoq pisuni ataasikaanni akuersissummik nutaamik qinnuteqartoqarsinnaassaaq, tamatumanili sakkortunerusunik piumasaqaateqartoqassalluni.
Qinnuteqaatit nutaat uunga nassiunneqassapput, corona@nanoq.gl.
Aasianni peqqinnissaqarfimmi sulisoq ataaseq ataasinngormat coronamik tunillatsissimasoq paasineqarpoq.
Pineqartoq tikinnerminut atatillugu Aasiaat napparsimmavianni sulisunik ikittunnguanik attaveqatsiarsimavoq, nunattali nakorsaanera isumaqarpoq, inuiaqatigiinni tuniluuttoqalersinnaaneranut aarlerinartoqarpallaanngitsoq.