Namminersorlutik Oqartussat akissutaat AG-p ilumuunnginnerarpaa

Namminersorlutik oqartussani inatsiseqarnermut pisortap soraarsinneqarneranik AG-p oqaluttuaanik tallimanngornermi siusinnerusukkut namminersorlutik oqartussani atorfillit qullersaata, Siulittaasup Naalakkersuisoqarfiani pisortap Svend Hardenbergip, ilumuunnginneraanera AG-p aaqqissuisuunerata upperinngilaa.
– Oqaluttuarisarput, tusarfinnik arlalinnik tunngavilik, soorunami ilumoorpoq, oqaluttuarlu tamanna sapaatit akunnerini sisamani-tallimani suliarisimavarput, Christian Schultz-Lorentzen oqarpoq taamaasilluni pasilliineq tunuartillugu.
– Svend Hardenberg oqaluttuarpoq paasissutissinneqarsimalluni oqaluttuarsi eqqunngitsoq, tamatumalu kingorna ilumuunnginneraanissaq namminersorlutik oqartussat iluanni piumasarisimallugu, oqarfigineqarsimallunili taamaasiortoqarsinnaanngitsoq, tassa namminersorlutik oqartussat iluanni kinaluunniit oqaaseqaqqusaanngimmat. Tamatumunnga qanoq oqassavit?
– Namminersorlutik Oqartussat isumaqarunik oqaluttuaq ilumuunngitsoq, tupigusuutigeqaara piffissaq aatsaat taama sivisutigisoq qaangeriutereersoq qisuariarmata. Oqaluttuaq uparuagassaqarsimasuuppat politikkikkut oqartussaanerpaaq, Naalakkersuisut siulittaasuat Aleqa Hammond, qisuariarsimassagaluarpoq. Tamatumanilu Aleqamut ajornartorsiutaavoq qisuariarsimannginnera.
Marloqiusamik ileqqulersorneq
– Aamma Svend Hardenbergip tusagassiorfinnut nalunaarutaa imatut paasivara namminersorlutik oqartussat allattoqarfianni sulisut ersarissumik oqaaseqaqqusaanngitsut. Maluginiagassaavoq isertortumik paasissutissiisarnermik aaqqissuussineq tapersersuutigalugu inuit oqaaseqarnissaat ersissutigineqarmat, Christian Schultz-Lorentzen oqarpoq.
– Tamatuma saniatigut eqqaamasassaavoq naalakkersuisoqarfinni pisortat sisamat soraarsimammata, taarserneqarnerat akileraartartunit akilerneqarluni namminersorlutik oqartussanit nassuiaateqarfigineqanngitsumik.
Atuaruk: "Naalakkersuisoqarfinni pisortat: Oqaaseqasinnaannginnerput pitsaasuunngilaq"-
Atuaruk: Naalakkersuioqarfimmi pisortaq: Taamaattumik oqaaseqarneq ajorpugut"
AG-mi normu 30-mi, sapaatip akunnerani pingasunngormat saqqummersumi, AG aææappoq nammonersorlutik oqartussani inatsiseqarnermut pisortaq Andreas Slamony - aviisip paasisaqarfii imminnut attuumassuteqanngitsut pingasut malillugit - juunimi soraarsitaasimasoq pissutigalugu Julie Rademacherip Naalakkersuisut siulittaasuannut atorfinitsinnerani pissutsit aviisimut mail-ikkut tunniunneqarnissaat kimigiiserutigigamiuk.
Sapaatip akunnerata uuma ingerlanerani arlaleriarluta Aleqa Hammond saaffiginniffigisaraluarlugu ersarissumik Sermitsiaq.AG-mit apersorneqarumanngilaq.
Aviisi allaaserisalik "Pisortaq inatsit malinniarmagu soraarsitaavoq" pisiariuk uani:

AG Uge 30 2013

Klik her for at læse