Namminersorlutik Oqartussat ajornartorsiuteqartoqarneranik nalunaartut: Akiuussutissalertissimanermut uppernasaat sapaatip akunnerata tulliani aatsaat tunniunneqarsinnaalissaaq
Ajornanngissangaluaqisoq ajornaatsuinnaanngilaq. Namminersorlutik Oqartussat sisamanngormat nalunaarutigaat, ateq inuullu normua mailikkut nassiullugu akiuussutissalertissimanermut uppernarsaammik pissarsisoqarsinnaasoq. Ullorli ataaseq qaangiutiinnartoq atortorissaarutitigut ajornartorsiuteqartoq nalunaarutigineqarpoq.
Nunanut allanut angalanissamik pilersaaruteaqaruit, Covid-19-imut akiuussutissalertissimaninnut uppernarsaammik tunineqarnissamut Coronamut atatillugu allattoqarfimmut qinnuteqarsinnaavutit. Neqeroorut innuttaasunut ilaannakortumik tamakkiisumilluunniit akiuussutissalertissimasunut, assersuutigalugulu Danmarkimiinnermi uppernarsaateqarnissamut pisariaqartitsisunut atuuppoq.
Akiuussutissalertissimanermut uppernarsaat nunanut allanut angalanermi atorneqarsinnaasoq ajornanngitsumik pissarsiarineqarsinnaavoq. Uppernarsaat atorlugu neriniartarfinnut, nujalerisunut, takornariarfissanut il. il. isertoqarsinnaavoq.
Namminersorlutik Oqartussat sisamanngormat ilisimatitsissutigaa, akiuussutissalertissimanermut uppernarsaat ateq inuullu normua vaccinationsattest@nanoq.gl-imut nassiunneratigut pissarsiarineqarsinnaasoq.
Inuppassuit nunanut allanut angalanerminni "akiuussutissalertissimanermut uppernarsaateqarnissamut" tassani eqqaasinneqarput. Namminersorlutik Oqartussat sisamanngormat tamanna nalunaarutigaat, aqanguanili tallimanngornikkut innuttaasut arlallit mailimik nassiussiniarnertik ajornartorsiutigisimavaat, tallimanngormallu Namminersorlutik Oqartussat allatut nalunaarutteqartariaqalersimallutik.
- Akiuussutissamik uppernarsaatinik tunineqarnissamik noqqaassuteqarnerit pillugit ajornartorsiuteqarpoq.
Taamaammat Vaccinationsattest@nanoq.gl atorneqarsinnaanngilaq, Namminersorlutik Oqartussat tallimanngormat nittartakkamikkut paasissutissiilutik allapput.
Nalunaarutigineqarpoq akiuussutissamik uppernarsaammik tunineqarnissamik noqqaassutit sapaatip akunnerata tulliata aallartinnerani suliarineqarsinnaaleqqissasut naatsorsuutigineqartoq.
Paasisaqarnerorusukkaanni corona@nanoq.gl attavigineqarsinnaavoq.