Skip to main content

Namminersorlutik Oqartussat: Aarfattassat pillugit isumaqatigiikkiartortoqarpoq

Ilisimatuussutsikkut ataatsimiititaliap siunnersuinera kingulleq aallaavigalugu 2015-2018-imut nutaanik pisassiissutissanik Kalaallit Nunaat IWC-p ataatsimiinnerani qinnuteqarniarpoq

Aarfattassat pillugit isumaqatigiinngissuteqartarnerit pitsanngoriartortut Namminersorlutik Oqartussanit nalunaarutigineqarpoq. Aarfanniartartut ataatsimiititaliaata IWC-ip Kalaallit Nunaata Danmarkilu isumaqatiginninniartarnerini ajornartorsiuteqartoqartartoq pitsaanerulersoq tassa oqaatigineqarpoq. 

- Kalaallit Nunaata Danmarkillu ataatsimoorlutik 2013-imi ukiakkulli IWC-mi nunat ilaasortat isumaqatiginninniarfigineqarneranni suliaat annertuut kinguneqarniarpasilerput, Aalisarnermut, piniarnermut nunalerinermullu naalakkersuisoqarfik nalunaarpoq. 

Ataatsimeeqatigiinnerni qitiutinneqarpoq Kalaallit Nunaata arfattassaanik ilisimatuussutsikkut tunngaveqarnerusumik aqutsinissap akuerineqarnissaa. Kalaallit Nunaata Danmarkillu ataatsimut aaqqiissutissaliaat septembarip qaammataani IWC-p Sloveniami ataatsimiinnerani saqqummiunneqartussaq EU-mit tapersersorneqarpoq.

Naalakkersuisut neriulluartut
- Aaqqiissutissaq IWC-p ataatsimiinnerani pisariaqartinneqartumik tapersersorneqarluartussatut nalilerneqartoq ilutigalugu Kalaallit Nunaata ukiuni sisamani aggersuni arfattassaasa nungukkiartuutaanngitsumik annertussuseqarnissaat qulakkeerneqassaaq. Naalakkersuisut Siulittaasuata Aleqa Hammondip aamma Aalisarnermut, Piniarnermut Nunalerinermullu Naalakkersuisup Finn Karlsenip oqaatigaat Naalakkersuisunit naatsorsuutigineqartoq Sloveniami IWC-p ataatsimiinnerani naapertuuttumik aalajangiinissaq akuersaarneqarluassasoq, Naalakkersuisut siuliuttaasuat Aleqa Hammond aalisarnermut, piniarnermut piniarnermut nunalerinermullu naalakkersuisoq Finn Karlsen tamarmik Siumumeersut nalunaaruteqarput. 

  • Aalisarnermut, Piniarnermut Nunalerinermullu Naalakkersuisoqarfiup aamma danskit Nunanut allanut Ministeriaqarfiata IWC-mit aalajangikkanik Kalaallit Nunaata arfernik angisuunik pisassai pillugit aaqqiissutissarsiorniarlutik 2013-imi ukiakkulli annertuumik isumaqatiginninniutigivaat.
  • Peqatigiit IWC-mi nunat ilaasortat ataatsimeeqatigisaqattaarpaat, 11-18 septemberimilu IWC-p Sloveniami ataatsimiinnissaanut piareersaatitut atortussanik suliaqarlutik. Ataatsimiinnerni nunat pingaarnerit tamarmik aamma IWC-mi suleqatigiit IWC-llu Allattoqarfia suliamut ilaatilluarneqarput.

- Oqaloqatigiinnerup nassataanik ataatsimut aaqqiissutissatut siunnersuusiortoqarpoq, tamanna Kalaallit Nunaata Danmarkillu aamma EU-p akornanni isumaqatigiissutaasoq makkunannga imaqarpoq:

IWC-p nalunaarutaata (Schedule paragraf 13(b)) allannguutissaatut siunnersuut – tassa ilisimatuussutsikkut siunnersuineq aqqutigalugu ukiuni sisamani aggersuni pisassat – kiisalu Naalakkersuisoqarfimmit uppernarsaat, pisassatut pisariaqartitanik (Need Statement) nassuiaasoq. Siunnersuut Kunngeqarfiup IWC-mi aallartitaannit saqqummiunneqassaaq.

Isumaqatigiissutissatut siunnersuut nunat inoqqaavisa pisassaannik IWC-p aqutsinerata nukittorsarneqarnissaanik siunnerfilik. Siunnersuut taanna EU-mi nunat 25-t IWC-mi ilaasortaasut saqqummiutissavaat Italiallu EU-mi siulittaasuutitaqartup saqqummiutissavaa.

- Suliassap tulleraa septembarimi IWC-p Sloveniami ataatsimiinnerani tapersersorneqarnissap siunnersuutillu akuerineqarnissaata qulakkeerneqarnissaa, tassa siunnersuutip naammassineqarnissaanut suli annertuumik sulisoqassaaq, Aalisarnermut, piniarnermut nunalerinermullu naalakkersuisoqarfik nalunaarpoq.

Ilisimatuussutsikkut ataatsimiititaliap siunnersuinera kingulleq aallaavigalugu 2015-2018-imut nutaanik pisassiissutissanik Kalaallit Nunaat IWC-p ataatsimiinnerani qinnuteqarniarpoq: Kitaani: tikaagulliit 164-it, tikaagulliusaat 19-it, qipoqqaat 10-t aamma arfiviit 2-t kiisalu Tunumi tikaagulliit 12-it. 

Arfeqatigiinnut tamanut IWC-mit nassuiarneqarsimasutut sinneruttumik pisassiissutit (carry-over) ilanngullugit. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER