Naluttarfiliornissamik pilersaarut Qeqqata Kommunianit taamaatinneqarpoq
Sisimiuni aqqap iluani naluttarfiliornissaraluaq taamaatinneqartoq borgmesteri Malik Berthelsen oqarpoq. Taamaattoq naluttarfiliornissanik allanik pilersaarutinik kommuni ujartuissaaq
Sisimiuni qaqqap iluani naluttarfiliornissaq Qeqqata Kommunianit taamaatinneqarpoq.
Tamanna borgmesterimit Malik Berthelsenimit Sermitsiaq.AG-mut ilisimatitsissutigineqarpoq.
- Tassa ajoraluartumik qaqqap iluani naluttarfiliornissamut suliffeqarfik ataasiinnaq neqeroornikuuvoq, neqeroorutillu akisuallaarujussuarnera pissutigalugu qaqqap iluani naluttarfiliornissaraluaq taamaatipparput, borgmesteri oqarpoq.
Akisussaassuseqanngitsuliornerussasoq
A.P Møller Fonden 50 millionit koruuninik naluttarfiliornissamut tapiinikuuvoq, 2018-mi naluttarfiup naammassinissaa siunnerfigineqarnikuulluni.
- Aningaasaqarnikkut akisussaassuseqanngitsuliornerussaaq illoqarfimmi 5.500-inik inulimmi ukiumut sanaartugassanut katillugit 130 million koruuninik missingersuuteqarfiusartumi naluttarfimmut 200 million koruunit atussagutsigit, taamaliussagaluaruttami innuttaasut pisariaqartitaannut allanut akissaarutissaagut. Taamaattoq aningaasat aningaasaateqarfimmit 50 million koruunit annaagaluarlugit neriuutigivarput aningaasaateqarfik allatigut suleqatigisinnaajumaarlutigu, Malik Berthelsen oqarpoq.
Sisimiuni Maniitsumilu
Naluttarfiliornissanut kommuni periarfissanik allanik ujartuisoq oqarpoq.
- Qularutiginngilarput naluttarfik sunngiffimmi sammisassaqartitsinermut annertuumik pitsanngorsaataassammat, taamaattumik massakkut misissussavarput Sisimiuni Maniitsumilu timersortarfinnut atasunik naluttarfiliussagutta qanoq akeqassanersut. Isumaqarpungalu timersortarfinnut atasunik sanasinnaagutta ulluinnarni ingerlatsinermut iluaqutissartaqartut, kisianni soorunani qanoq akeqassanersut apeqqutaassapput, Malik Berthelsen oqarpoq.
Misissuinissanut kommuni aningaasanik suli illikartitsinngilaq.