Nalunaarut: Spritserisoqartassaaq
Coronamut atatillugu killilersuutit sakkukillineqassasut påske sioqqullugu aalajangiunneqarpoq. Nalunaarut nutaaq kikkuni tamanit maanna pissarsiarineqarsinnaanngorpoq, tassanilu aaqqissuussisoqarnerani spritserisoqartarnissaanik immikkut illuinnartumik piumasaqaatitaqarpoq.
Malittarisassat nutaat, coronamut atatillugu killilersuutinik nassuiaasut ullumi atuutsinneqalerput, arlaannillu aaqqissuussisimasut unioqqutitsissanngikkunik akiligassinneqassanngikkunillu nalunaarut atuaqqissaartariaqarpaat.
Allassimavoq inunnik 50-it sinnerlugit peqataasoqartussamik aaqqissuussisoqartillugu, aaqqissuisut allassimasunik malittarisassaliussasut, ilaatigut qulakkeerniarlugu, ”pequtit aamma atortut qaavi peqataasunit arlalinnit attorneqartartut, pisariaqartitsineq naapertorlugu tunillannartuiarneqarnissaat, minnerpaamilli tamanna akunnerit allorlugit iliuuserineqassaaq”.
Imminut qanillinaveersaarnissamut piumasaqaat
Aamma allassimavoq, peqataasut minnerpaamik to meterinik imminnut ungasitsigisumiittassasut, ”tamanna aaqqissuussinerup ingerlanneqarnissaanut akornutaanngippat”.
Nalunaarummi misissortissimanissamut inininullu tunngatillugit piumasaqaatit nassuiarneqarput, aaqqissuussinerillu nutaanik piumasaqaateqarfigineqartut allaaserineqarlutik. Tassa kuisitsinerit, inuuissiornerit, apersortinnerit aamma soraarummeertoqarneranut atatillugu nalliuttorsiortitsinerit, katinnerit ilisinerillu killilersuutinut ilaatinneqanngillat.
Malittarisassat nutaat pillugit tugassiortunik påske sioqqullugu katersortitsisoqarpoq, nalunaarulli aatsaat apriilip 16-iani peqqissutsimut naalakkersuisumit Martha Abelsenimit atsiorneqarpoq, taannalu naalakkersuisut nittartagaatigut maanna atuarneqarsinnaavoq.
Ilisimatitsissut kukkusoq
Nalunaarutip atsiornissaanut ullorpaalunni piareersartoqarsimagaluartoq kukkusoqarsimavoq. Ilisimatitsissutigineqarpormi nalunaarut atsiorneqarmat ”Namminersorlutik Oqartussat nalunaarutaat nr. 11, 15. januar 2021-meersoq” atorunnaarsinneqartoq. Nalunaarummi taanna pigineqanngilaq, ilimanarpoq ”nalunaarut nr. 11, 15. februar 2021-meersoq” atorunnaartoq oqaatiginiarneqaraluartoq.