Nalunaarut: Ilinniartut meeqqerivinni inissaqartoqannginnera pissutigalugu ilinniarnerminnik unitsitsiinnartarput

Kommuni Kujallermi Siumumi polikkerip Margrethe Thårup Andersenip, Qaqortumi ilinniarnertuunngorniarfimmi ilinniartut, meeqqatik meeqqerivinni inissaqanngimata ilinniarnerminnik taamaatitsiinnartarnerat ernumanartutut isigilluinnarpaa.

Qaqortoq,

Ilinniagallit pingasut meeqqerivimmi inissaqartitsisoqalernissaanut utaqqisorpassuaqarnera pissutigalugu Campus Kujallermi ilinniarnerminnik unitsitsiinnartariaqarsimapput, taamatut Margrethe Thårup Andersen tusagassiorfinnut nalunaaruteqarluni ilisimatitsivoq.

- 2021-mi maajip qaammataani Kommuni Kujallermi borgmesteri kaammattorpara, ajornartorsiutaasartoq manna pillugu Ilinniartitaanermut, Kultureqarnermut, Timersornermut Ilageeqarnerullu Naalakkersuismut attaveqaqqullugu, arlaatigut iliuuseqartariaqaratta, taanna nassuiaavoq.

Margrethe Thårup Andersenip meeqqerivinni Namminersorlutik Oqartussat akisussaaffiginngisaanni pisariaqartinneqartunik inissaqartitsinissa kommunimit suliassaasoq isummerfiginngilaa, taamaammat Ilinniartitaanermut, Kultureqarnermut, Timersornermut Ilageeqarnermullu Naalakkersuisoq akulerutsissallugu pissusissamisoortutut isikkoqanngilaq.

Aningaasaqarnikkut ilungersunartorsiortoq

Kommune Kujalleq aningaasaqarnikkut ilungersunartorsiorpoq, akiilisinnaassutsikkullu ajornartorsiulinnginnissani anguniarlugu immikkut ittumik aningaaserivimmit taarsigassarsinissamut akuerineqaqqammerluni. Borgmesterip aamma nalunaarutiginikuuaa, aningaasaqarneq iluarsiiffiginiarlugu annertuumik sipaarniuteqartoqarniartoq.

Siumumili politikkerip ukioq ilinniarfiusussaq suli aallartinngitsorluunniit ilinniagaqartut ilinniarnerminnik unitsitsiinnartariaqarnerat nuannarinngilluinnarpaa.

- Aaqqissuussaanikkut ilinniagaqartut ilinniagaqarnissamut periarfissaqartinneqannginnerat ilumoorsinnaanngilaq, taanna oqarpoq, kaammattuutigalugulu ataatsimoorluni ajornartorsiummut aaqqiissutissarsiortoqassasoq, politikkikkummi annertuumik kissaatigineqarmat – partii sorliunersoq apeqqutaatinnagu – inuusuttut ilinniagaqarnissaat.

Powered by Labrador CMS