Nalunaarutiginnittoqarneruleraluartoq Maniitsumi suli ikinnerupput

Qeqqata Kommuniani meeqqat inuusuttullu ernumaatigineqartut pillugit nalunaarutiginninnerit ukiuni kingullerni marloriaatinngorsimapput. Maniitsumili taama inngilaq, illoqarfimmut sanilerisamut sanilliukkaanni, nalunaarutiginninnerit amerleriaataat appasippoq.

Qeqqata Kommuniani kommunimi pisortaaneq, Paneeraq Olsen isumaqarpoq nalunaarutiginninnerit ukiuni kingullerni amerleriarnerisa appasinnerannut pissutaanngitsoq paqumisunneq. Maniitsumili innuttaasut Sisimiuni innuttaasunit ikinnerunerat, qaffariaatsip appasinneranut pissutaavoq.

- Isumaqanngilanga Maniitsumi sulisut Sisimiuni sulisunut sanilliullugit nalunaarutiginninnissaminnut tunuarsimaanerunersutut, Paneeraq Olsen Sermitsiaq.AG-mut oqarpoq.

Kalaallit Nunaanni Naatsorsueqqissaartarfiup kisitsisaatai kingulliit naapertorlugit Maniitsumi meeqqat inuusuttullu 18-it inorlugit ukiullit katillugit 710-upput. Sisimiuni nunaqarfiinilu meeqqat inuusuttullu 18-it inorlugit ukiullit 1.600-pput.

Meeqqat ikinneruppata nalunaarutiginninnerit ikinnerussapput

Qeqqata Kommunia illoqarfinni nunaqarfinnilu sulisuminut 2018-imi arlalitsigut pikkorissaavoq. Sulisut meeqqeriveqarfinni, meeqqat atuarfiini, politiini, peqqinnissaqarfimmi isumaginnittoqarfimmilu sulisuusut pikkorissarneqarnerminni meeqqat ernumanaatearsinnaasut ilisarnaataannik takunnissinnaanerulernissaminnut sakkussanik pissarsipput.

Sisimiuni isumaginnittoqarfimmut nalunaarutiginninnerit ukiut marluk ingerlaneranni marloriaatinngungajassimapput. Maniitsumili nalunaarutiginnissutigineqartut qaffariarnerat taama annertutiginani.

Maniitsumi ukiumut nalunaarutiginninnerit:

  • 2016: 160
  • 2017: 180
  • 2018: 188

Sisimiuni ukiumut nalunaarutiginninnerit:

  • 2016: 210
  • 2017: 369
  • 2018: 415

Tassa imaappoq Maniitsumi ukiut marluk ingerlaneranni nalunaarutiginnittut 28-nik amerleriaateqarsimapput. Sisimiuni piffissami tassani nalunaarutiginnittut 205-inik amerleriarsimallutik.

Politiinut sulianik nalunaarutiginnittoqarpoq

Politiit ukiumut kisitsisaataat 2018-imeersoq naapertorlugu illoqarfiit arlallit meeqqamik 15-it ataallugit ukiulimmik atoqateqartoqarsimaneranik sulianik nalunaarsuisoqarsimanngilaq. Maniitsumi aamma nalunaarutiginnittoqarsimanngilaq.

- Aasianni suliat qulingiluaanerannit aamma Nanortalimmi suliat aqqaniliunerannit, assersuutigalugu Maniitsumi imaluunniit Narsami suliaqannginnerput ernumassutigineruara, politimesteri Bjørn Tegner Bay, Sermitsiaq.AG-mut marsip aallaqqaataani oqarpoq.

Paneeraq Olsenilli politimesterip Maniitsumi sulianik tunniussisimannginnermut tunngatillugu oqarnera ilisarisinnaannginnerarpaa. Kommuni sulianik politiinut 2018-ip ingerlanerani tunniussaqarsimavoq.

- Kinguaassiutitigut atornerlunneqarsimasinnaasunik pasitsaassaqarluta sulianik pingasunik Maniitsup politiivinut kommunimiit 2018-imi ingerlatitseqqiinikuuvugut, Paneeraq Olsen nassuiaavoq.

Powered by Labrador CMS