Nalunaaruteqarsinnaanermut aaqqissuussaq nutaaq atuutsinneqalersoq

Kalaallit Nunaanni Atuisoqarnermut Unammilleqatigiinnermullu Aqutsisoqarfik unammilleqatigiinnermut inatsimmik unioqqutitsinerit pillugit kinaassutsimik isertorluni kalerriutigineqatarnissaannik ilisimatitsissutigineqartarnissaannillu kissaateqarpoq. Inatsisip nutaap tamanna qulakkiissavaa

Unammilleqatigiinnermut inatsit isumagisinnaajumallugu pilersaarutaavoq, inatsit aqqutigalugu innuttaasut kinaassutsiminnik isertuussillutik kalerriuteqarlutillu paasissutissiisarnissaannik atuutsitsilernissaq, unammilleqatigiinnermut oqartussat saqqummiunneqartut aallaavigalugit iliuuseqartalernissaat anguniarlugu.

- Suliffeqarfiit aamma innuttaasut unammileqatigiinnermi oqartussaasunut unammilleqatigiinnermi inatsimmik unioqqutitsinerusinnaasut pillugit saaffiginnikkaangata, taava tamanna unammilleqatigiinnermi oqartussanut saaffiginnittunut kinguneqarsinnaavoq, inatsisissatut siunnersuummi nutaami ullumilu periuserineqartartumi taamatut allassimasoqarpoq.

- Siunnersuut qularnaareqataassaaq Atuisoqarnermut aamma Unammilleqatigiinnermut Aqutsisoqarfiup kinaassutsimik isertuussilluni saaffiginnissutinik suliaqartoqartoqarsinnaaneranik, taamaallaallu akuersisoqareerneratigut kinaassutsimik isertuussilluni saaffiginnissutaasut paasissutissiissutigisinnaallugit, imaluunniit saaffiginnissutit imarisaat paasissutissiissutigisinnaallugit, inatsisissatut siunnesuummi Inuussutissarsiornermut Naalakkersuisoqarfiup decembarip 27-anut killilerlugu tusaniaassutigalugu nassiuteqqammersaani taamatut allassimasoqarpoq.

Allaffissornikkut akiligassiinerit

Aaaqqissuussamik atuutsitsilerniartoqarpoq, tassa eqqartuussivik akuutinngikkaluarlugu suliamik aalajangiisoqarsinnaanngorlugu.

Isumaavoq akiliisitsisoqartassasoq ”pineqartoq unioqqutisinermini pisuusutut nalunaarpat, ilisimatitsillunilu piffissap ersarinnerusumik aalajangersagaasup iluani, qinnuteqartoqarnera naapertorlugu sivitsorneqarsimasup iluani akiliisitsissummik akiliisinnaalluni”, inatsisissatut siunnersuummut, Inatsisartuni amerlanerussuteqartut akuersissappata juulip aallaqqaataani atuutilersussamut tusarniaassummi tamanna takuneqarsinnaavoq.

Kattussinnaanermut killiliussat nutaat

Peqatigitillugu suliffeqarfiit marluk kattunniarpata, unammilleqatigiinnermut inatsisip qaqugukkut atuuttarnissaa nutaanik killiliiffigineqarpoq.

- Ingammik ajornartorsiut pilersarpoq, kattunneq pigaangat suliffeqarfiit Kalaallit Nunaanni nioqqutissiassanik suliarineqanngitsunik pisiortortartut avammut niueruteqarnissaq siunertaralugu pigaangata. Taamaasilluni aningaasat kaaviiaartitat Kalaallit Nunaanni inissisimasanngillat, taamaattumillu ilanngullutik naatsorsuunneqassanatik naliliinermi, kattunneq pisoq nalunaarutigineqartussatut pisussaaffeqarnersoq nalilerneqaraangat. Kattunnerit taamaattut angisuumik sunniuteqarsinnaasarput niuerfiusunik aalisakkanik aamma qalerualinnik Kalaallit Nunaanni niuerfimmi sunniutaasunik isiginiaanerni, tamatumanissaaq aalisartut pisaminnut qanoq akilerneqartarneri eqqarsaatigalugit, nassuiaammi allassimavoq.

- Allannguinikkut aningaasanik kaaviiaartitanik paasinninneq nuuppoq nunap nammineq iluaninngaanniit, nunat tamalaat akornanni aningaasanik kaaviiaartitsinermik paasinninninngorluni. Naligititatut killiliussat kattuttuni apparneqassapput 100 millioner koruuniniit 25 millioner koruuninut, minnerpaamik suliffeqarfiit peqataasut tamarmik immikkut nunat tamalaat akornanni kaaviaartitaqarpata 10 millioner koruuninik. Qularnaarumallugu taamaallaat kattuttut peqataasut Kalaallit Nunaanni niuerfiusunut sunniuteqarnissaat, kattuttarnermut malittarisassani ilaareersut, siunnersuutigineqarpoq ilanngullugu piumasaqaat, minnerpaamik tamatumani suliffeqarfinni peqataasuni ataaseq Kalaallit Nunaanni najugaqartuussasoq, inatsisissatut siunnersuut nutaaq pillugu tusarniaassutigineqartumi tamanna takuneqarsinnaavoq.

Powered by Labrador CMS