Nalunaarusiaq: Utoqqaat amerlanerit Nunatsinniiginnartut
Naalakkersuisup utoqqaat Nunatsinniit allamut nuussimasut amerlassusaat nuannersumik tupaallaatiginerarpaa.
Namminersorlutik Oqartussat nalunaarusiaminni inerniliussimavaat, utoqqaat amerlanerit nunatsinniiginnartartut.
Isumaginninnermut Sulisoqarnermullu Naalakkersuisoqarfiup nalunaarusiamini Nunatsinni utoqqaat pillugit paasissutissat arlallit katersorsimavai.
Ilaatigut inuuffigisassap sinneratut naatsorsuutigisat, nunassittarneq suliffeqarnerlu tassani pineqarlutik.
Naalakkersuisoqarfimmi nunanut allanut nuuttarneq eqqarsaatigalugu, piffissaq 2010-miit 2020-moortoq misissorsimavaa. Tassani paasisimallugu innutaassut agguaqatigiissilluit 2.240-t nunatsinnut nuussimapput, innuttaasulli 2.591-it nunanut allanut nuussimallutik.
60-iniik 64-inut ukiullit allanut nuussimasunit amerlanersaasut
Tassa amerlanerpaat nunanut allanut nuussimapput, nunamit nutsertut agguaqatigiissillugit ukiumut 351-iusarsimallutik.
Naalakkersuisoqarfiup tulliullugu 50-ileereersimasut allanut nuuttarnerat naatsorsorsimavaa. Ukioqatigiittut eqimattut 60-64-inik ukiullit ilanngaateqareerluni nunamit nutsertuni amerlanerpaasimapput, nunamut nuuttunut naleqqiullugit innuttaasut 47-nik amerlanerusut nunamiit allanut nutsersimagamik.
- Innuttaasunut 55-it sinnerlugit ukiulinnut ukioqatigiittuni immikkoortuni ukioqatigiittut eqimattanut ataasiakkaanut tamanut agguaqatigiissitatut innuttaasunut ilanngaateqareerluni nunamit aallartut tassaapput katillugit 0,7 %-it aamma 2,3 %-it akornanniittut. Taamaattumik innuttaasut utoqqaanerusut utoqqaallu amerlanerpaat Kalaallit Nunaanni najugaqaannartuunerannik takussutissiami takuneqarsinnaavoq, Naalakkersuisoqarfik allappoq.
Naalakkersuisoq: Utoqqaliartorfigissallugu ajunngitsuusoq
Isumaginninnermut Sulisoqarnermullu Naalakkersuisoq Mimi Karlsen (IA) isumaqarpoq, kisitsisit takutikkaat Kalaallit Nunaat utoqqaliartorfigissallugu ajunngitsuusoq:
- Ima isumaqartoqarpoq, inuit ukioqqortusigaamik Kalaallit Nunaannit nuuttoqartartoq. Qujanartumik takusinnaavarput, inuit 50-ileereersut ikittuinnaat nuuttartut. Kalaallit Nunaat utoqqaliartorfigissallugu ajunngitsuusoq tamassuma takutikkaa isumaqarpunga.
- Utoqqaat tamarmik inuuniarnermikkut atugassarisaat naammaginngilara, Naalakkersuisullu pimoorullugu suliariniarpaat utoqqaat inuuniarnermikkut atugaat pitsanngorsarniarlugit, tamaalilluni kikkut tamarmik utoqqaligunik ajunngitsumik inuuniassammata, Mimi Karlsen tusagassiorfinnut nalunaaruteqarnermi oqarpoq.