Nalunaarusiaq: Tasiilap ilinniarfeqarnissaa pillugu suleqatigiissitat misissuipput

Tasiilap ilinniarfeqarsinnaaneranut pilersitsinissamut periarfissat pillugit, suleqatigiissitaq nalunaarusiamik saqqummersitseqqammerpoq.

Tasiilami peqqinnissaqarfimmi, inunnik isumaginnittoqarfimmi, allaffissornermi sulisuni ilinniartitsisuni allanilu ilinniarsimasunik amigaateqartoqartorujussuusoq, nalunaarusiap inerniliussaasa ilagaat.

Naalakkersuisut Tasiilap illoqarfittut ineriartornissaa periarfissaqarneralu pillugit 2016-imili ukkassilerput. Suleqatigiissitallu siammasissumik sinniisoqartup Tasiilami ilinniarfimmik qanoq ittumik pilersitsinissaq tulluarnerunersoq maanna misissuiffigisimavaa.

Suleqatigiissitap ilinniaqqiffiusinnaasut assigiinngitsut naliliiffigisimavai:

  • TNI-Flex
  • Najugarisaq qimannagu ilinniartitaaneq
  • Ungasianiit ilinniartitsinerit
  • Piginnaasavinnik nalilersuineq

Isumassarsiorfik

Suleqatigiissitap TNI-Flex, tassaasoq meeqqat atuarfianni naammassisimasunut TNI-milu ilinniagaqalerusuttunut piginnaanngorsarfiusoq, isumassarsiorfigisimavaa.

TNI-Flexip saniatigut suleqatigiissitap najugarisaq qimannagu ilinniartitaanermi periarfissaq misissorsimavaat, ilaatigut perorsaanermik ilinniarfik isumassarsiorfigisimallugu. Aammali ungasianiit ilinniartitaasinnaaneq, tassa ilinniartut internet atorlugu ilinniartinneqarsinnaanerat, misissuiffigisimallugu.

Inuusuttut kissaataat allanngorarput

Suleqatigiissitaq ilaatigut Tasiilami Majoriamit, Tasiilap Alivarpianit, Kommuneqarfik Sermersuumit Ilinniartitaanermullu Naalakkersuisoqarfimmit sinniisoqarpoq. Meeqqat atuarfiini naammassisussat ilinniaqqinnissamut kissaataat aamma paasiniarsimavaat.

Nalunaarusiami inerniliunneqarpoq ilinniaqqiffiit pilerigineqartartut ukiumiit ukiumut allanngorartartut.

Inuusuttulli ilinniaqqikkusukkaluarlutik, meeqqat atuarfiinilu naammassereernerup kingorna ilinniakkamik ingerlaqqiffiusumik aallartitsisaraluarlutik, taamaattoq unittartut amerlapput, ilaatigut inuttut unammilligassat suliffimmillu misiliiffissamik amigaateqarneq pissutaasinnaasarlutik.

Iluatsittulli arlaqarput, nalunaarusiami allapput. Innuttaasut arlallit piginnaanivimminnik nalilersuiffigitereerlutik peqqissaanerup iluani ilinniakkamik naammassinnissinnaasimapput, nalilersuereernerup kingorna suliffimmik misiliineq aamma sivikillisinneqarsinnaasimavoq.

Inassutit

Suleqatigiissitat inassutigaa Naalakkersuisut suliniutiminnik nangitsissasut, suliniummi inuusuttut pisariaqartitaminnik aqqutissiuunneqarsinnaammata. Ilanngullugu inassutigineqarpoq Tasiilami ilinniarfimmik pilersitsisoqassappat, taanna Tasiilami Alivarpimmut atatillugu sananeqassasoq, ilinnialersut ilisarisimasaminnik avatangiiseqarniissaat anguniarlugu.

Powered by Labrador CMS