Nalunaarusiaq: Ruslandi Kunngeqarfimmut 'sunniuteqartussanik iliuuseqarsinnaavoq'

- Ruslandip Nunallu Kitaamiut akunneranni najummatsisimanartoqarnera Issittumut sunniuteqarsinnaavoq, tamatumalu malitsigisaanik Issittoq sakkutooqarnerulersinnaalluni.

Kunngeqarfiup Danmarkip sillimaniarnermi inissisimanera pillugu ukiumoortumik nalunaarusiami, Illersornissaqarfimmi Isertortumik Paasiniaasartut saqqummiuteqqammisaanni taamatut inerniliisoqarpoq.

Nalunaarusiami Issittoq sammineqangaatsiarpoq, isertortumillu paasiniaasartut isumaqarput, Ruslandi issittumi akerleriissutaasinnaasunik atuutsitsinaveersaassasoq, tamannali ajornakusoortissinnaagaat, aamma pissutsit ullumikkut itsillugit Ruslandi allanut mattussaaqqatinneqarnermini Kinamut pinngitsoorsinnaanngisaminik attaveqarniarnerulissammat.

- Tamatuma malitsigisaanik qularnanngitsumik Issittumi sillimaniarnermut politikkimi aaqqiagiinnginnerusoqalissaaq, taamalu Ruslandi, Kina USA-lu Issittumi pissaaneqarniunnerulissallutik, isertortumik paasiniaasartut nalunaarusiaminni allapput.

Avissaartuutsitsiniarsinnaasut

Isertortumik paasiniaasartut isumaqarput, Ruslandip Nunallu Kitaamiut aaqqiagiinngissuteqarnerisa kingunerannik Ruslandi Kunngeqarfimmut sunniuteqartussanik iliuuseqarsinnaasoq:

- Danmarkip, Savalimmiut Kalaallillu Nunaata Issittumut atatillugu soqutigisaasa assigiinngissutaat Ruslandimit maluginiarneqassapput.

- Assersuutigalugu Ruslandimut pillaatitut iliuuserineqartunut assigiinngitsunik isumaqarnerit, Ruslandimik suleqateqaqqilernissamut assigiinngitsunik kissaateqarnerit aamma Kunngeqarfimmi kitaamiut assigiinngitsut sakkulersorneranni sakkutooqarnerannilu, Illersornissaqarfimmi Isertortumik Paasiniaasarttut allapput.

Isertortumik paasiniaasartut isumaqarput, Danmarkip issittumi piginnaasanik annertusaaneranut atatillugu Issittup avatangiisinut issittumilu najugaqartunut ajoqutaasussamik Danmarki Issittumi sakkulersorneroqataasoq pillugu Ruslandimit siammarterisoqarsinnaavoq. Issittumi piginnaasanik annertusaanermut atatillugu Kalaallit Nunaanni nakkutilliisoqarnerulernissaanut aningaasaliissuteqartoqarsimavoq.

Peqqarniitsunik iliuuseqarsinnaasut

Ruslandi Ukrainemut sorsunnermini isumalluuterpassuarnik atuisimagaluartoq, Ruslandip Issittumi sakkutooqarnikkut pissaaneqarnermi siuttuunini atorluarlugu aqqartartut rakettinik sakkullit atorlugit alapernaarsuisarnini sakkutooqarfimminillu annertusaanini ingerlatiinnassagai nalilerneqarpoq.

Isertortumik paasiniaasartut aamma isumaqarput, Sverige pingaartumillu Finlandi Nato-mut ilaasortanngorpata Ruslandip Issittumi aarlerinartorsiortitsisoqarneranik isumaqarnera sunnerneqassasoq, taamaammallu Ruslandip Issittumi soqutigisani qulakkeerniarlugit siusinnerusumut sanilliullugu sakkutooqartitsinerulissasoq:

- Ruslandi peqqarniitsunik iliuuseqarnissamut, soorlu kitaamiut sakkutuuisa imarsiortut umiarsuaat qanillivillugit timmisartumik nakkutilliisarnissamut, kitaamiut umiarsuaannik timmiasartuutaannillu saassussinermik pisuusaartitsilluni sungiusarnissamut, timmisartut qaartartunik nakkaatitsisartut atorlugit kitaani naalagaaffiit issittormiut qanillivillugit Qalasersuarluunniit Avannarleq qulaallugu timmisartunik nakkutilliisarnissamut kiisalu isertortumik paasiniaasarnissamut nukissaqarpoq, nalunaarusiami allassimavoq.

Isertortumik paasiniaasartunit erseqqissaassutigineqarpoq, USA Issittumik ukkatarinnittorujussuusoq, taamaammallu nunat kitaamiut Issittumi sakkutooqarnikkut suliassanik annertusaanerulissasut sakkutooqartitsinerulissasullu ilimanarluinnartoq. Ruslandimit aamma taamatut iliortoqassasoq ilimagineqarpoq.