Nalunaarusiaq: Royal Greenlandip tunineqarnissaa

Ingerlatseqatigiiffiit Namminersorlutik pigineqartut akornanni ataaseq immikkuullarissuuvoq, ilaannakortumik tamakkiisumilluunniit namminersortunngortinneqartuuppat iluaqutaasussaq, aamma Nunatta Karsiata milliardilikkaanik isertitaqarnissaanik qulakkeerinnissangaluartoq. Nassuiaammi nutaami tamanna allassimavoq.

Royal Greenland ukiuni kingullerni millioninik pingasunik kisitsisitalinnik sinneqartoortarluni angusaqarluartarsimavoq. Taamaalilluni aalisakkerinermi suliffissuaq tunineqartuuguni, Nunatta Karsia 2,5 aamma 5 milliarder koruunit akornanni ataasiartumik isertitaqartissagaluarpaa.

Tamanna atuarneqarsinnaavoq, uani ”Ingerlatseqatigiiffinni Namminersorlutik Oqartussanit pigineqartunik namminersortunngorsaanermut nassuiaat 2019”, Naalakkersuisut Siulittaasuata Naalakkersuisoqarfiata allattoqarfianit suliarineqarsimasumi. Ingerlatseqatigiiffiulli niuernermi nalinga eqqoqqissaartumik naatsorsorneqassappat, immikkut ittumik misissueqqissaartoqartariaqartoq, nassuiaammi erseqqissaatigineqarpoq.

Akianut sunniuteqarsinnaasoq pingaaruteqartorlu tassaavoq, suliffeqarfissuaq ilaannakortumik tunineqassanersoq, aamma annerpaamik minnerpaamilluunniit piginneqataasoqassanersoq.

Aalajaannerulissasoq

Erseqqissaatigineqarpoq, ingerlatseqatigiiffik pisortanit pigineqarunnaassappat, Royal Greenlandip ineriartortinneqarnera angusarisartagaalu pitsaanerulissasut.

- Ingerlatseqatigiiffik politikkikkut aqunneqarunnaassaaq, taamaalilluni siumut oqaatigissallugit ajornartartut peerneqassapput ingerlatseqatigiiffillu aalajaannerusumik ingerlanneqalerluni, nassuiaammi allassimavoq.

- Tamatuma saniatigut piginnittut amerlanerulernerisigut suliffeqarfik piginnaasanik ilisimasanillu nutaanik pissarsissaaq, taamalu aamma Kalaallit Nunaanni suliffeqarfinnut allanut pitsaasumik sunniuteqarluni. Suliffeqarfik namminersortunit ingerlanneqalertuuguni pitsaaumik sunniuteqassaaq, tamatumami kinguneranik pitsaanerusumik angusaqartalernissaa, taamalu iluanaarutinik annertunerusunik tunniussisalernissaa naatsorsuutigineqarmat, nassuiaammi allassimavoq.

Isumannaannerulissasoq

Aalisarnermik suliaqartunit naatsorsuutigineqarpoq, aalisarnermik suliaqarfik immikkuualuttorpassuarnut agguarsimasoq ukiut tallimat qulillu tulliuttut ingerlaneranni isumannaannerulissasoq – nunami maani nunarsuullu sinnerani.

- Tassa Royal Greenland A/S periarfissagissaarnerulissaaq aalisakkerinermi ingerlatseqatigiiffinnut allanut kattunnissamut. Royal Greenland A/S ingerlatseqatigiiffinnik allanik pisiaqarsinnaavoq, taakkulu ataatsimooqatigilerlugit, imaluunniit Royal Greenland A/S aalisakkerinermik ingerlatsisunit nunanit allaneersunit pisiarineqarsinnaavoq, taakku ataatsimooqatigilerlugit.

Royal Greenland

Kisitsisit 2018-imut naatsorsuutinit tunngaveqarput:

Ilanngaatissat peereerlugit kaaviiaartitat: 5,2 milliarder kr.

Nammineq aningaasaatigisat: 1,5 milliarder kr.

Ukiumi angusat: 126 millioner kr.

Sulisut amerlassusaat: 2.228

Namminersortunngortinneqarnermi Roayl Greenland A/S periarfissaqalissaaq, aalisarnermik suliaqarfik immikkuualuttorpassuarnut agguarsimasoq ukiut tallimat qulillu tulliuttut ingerlaneranni isumannaallisarneqarnerata peqataaffiginissaanut.

Kingunerisinnaasai

Nassuiammi aamma erseqqissaatigineqarpoq, namminersortunngorsaaneq inuiaqatigiit aningaasaqarnerannut kingunqarsinnaasoq.

- Ingerlatseqatigiiffik namminersortunngortinneqaruni inuiaqatigiit politikkikkullu ingerlatsisarnerit eqqarsaatigisarunnaassavai. Royal Greenland A/S-p namminersortunit ingerlaneqalerneratigut Kalaallit Nunaanni inuiaqatigiinnnut kingunerisinnaasai tassaapput, niuerfigisartakkani ullummikkut imminut akilersinnaanngitsumik ingerlatat annikillisinneqarnerat. Assersuutigalugu suliffiit nunanut allanut nussorneqarnerat pisariiillisaanerlu pissutigalugit sulisut ikilisinneqarnerat, ilinniagaqarnissamut periarfissalunnerulerneq, avatangiisinut tunngatillugu piumasaqaatit ajornerulernerat suliassakinnerulernerlu, nassuiaammi allassimavoq.

Royal Greenland Kalaallit Nunaanniinnaq 1.400-nik sulisoqarluni Namminersorlutik Oqartussat suliffeqarfiutaasa annersaraat, Namminersorlutillu Oqartussat suliffeqarfimmik piginninnerminni siunertaraat, Kalaallit Nunaanni tamarmi suliffissaqartitsinissaq.

Najukkami tunisassiorneq

- Royal Greenland A/S tunisassiornermik ullumikkut ingerlatsisuuvoq, pingaartumik Kalaallit Nunaata kitaani, sineriammi najugaqarfippassuarnut nuannaarutaasumik iluaqutaasumillu. Namminersortunngorsaanerup sunniutigisinnaasai Namminersorlutik Oqartussanit isumagineqartussaapput. Tamanna assersuutigalugu pisinnaavoq, Namminersorlutik Oqartussat annikinnerusumik piginneqataaneratigut, taamalu piumasaqaateqarsinnaalluni. Tamatuma ilaatigut najukkani tunisassiorneq ingerlatiinnassavaa, nunanut allanut nussuinissaq pinngitsoortissavaa inuiaqatigiinnillu eqqarsaatigisassat allat qulakkiissallugit, aammali Royal Greenland A/S-imi piginneqataassutit tunineqarneranni akigititassat sunnersinnaallugit, nassuiaammi erseqqissaatigineqarpoq.

Oqaaseqaateqarnermi ilaatigut allassimasoqarpoq, “suliassaqartitsineq eqqarsaatigalugu suliassat ingerlatseqatigiiffimmut aalajangersimasumut immimmoortinneqarsinnaapput – sinnerilu tunillugit”.

Ingerlatseqatigiiffiit allat Namminersorlutik Oqartussanit pigineqartut, namminersortunngorsarneqarnerat inuiaqatigiinnut malunnaalitilimmik kingunerluuteqarsinnaapput.

Powered by Labrador CMS