Nalunaarusiaq: Peqatigiiffiit Kalaallit Nunaanni atugaat ilungersunarput
Peqatigiiffiit Kalaallit Nunaanniittut ataasiakkaanit aallussilluartoqartunit aqunneqartarput, taamaattumillu assersuutigalugu nuuttoqarneratigut allanit aqunneqarsinnaaneq ajorput. Aammattaaq peqatigiiffiit amerlasuut mikisuararsuupput.
Innuttaasut ikittuusut sumiiffinni killeqartuni siammarsimaneri, timmisartumik imaatigulluunniit tikikkuminaatsuni, najukkani peqatigiiffiit alliartornissaannut akornutaasarput. Aammattaaq inuit ataasiakkaat suliniuteqarluartut peqatigiiffiit ingerlatippaat, taamaattumillu peqatigiiffiit qajannartuupput.
Naalagaaffeqatigiinnermi peqatigiiffiit suleqatigiinnerat pillugu Nordplusip, Nunat Avannarliit Siunnersuisoqatigiivisa ataaniittup, nalunaarusiaani taama inerniliisoqarpoq:
- Peqatigiiffiit mikisuusarput, taakkualu ingerlatiinnarnissaannut ilaasortanik/peqataasartunik naammattunik katersuineq ajornakusoortarpoq. Taamaalillutik peqatigiiffiit inunnik ataasiakkaanik isumalluuteqartorujussuusarput, inuillu ingerlatitsisut (aallussilluartut) unippata/nuuppata peqatigiiffiit matuneqarsinnaapput.
- Tamassuma saniatigut inuiaqatigiit pisortallu akornanni sunniivigeqatigiittoqarpallaanngilaq, attaveqaqatigiinnikkut tapersersuinikkulluunniit, nalunaarusiami allassimavoq.
Naalagaaffeqatigiinnermi ikinnerusut suleqataanerat
Naalagaaffeqatigiinni peqatigiiffiit kulturimut, ilinniartitaanermut, isumaginninnermut avatangiisinullu tunngasunik suliniuteqartut qanoq suleqatigiinnissaminnut periarfissaqarnersut Nordplusip misissorsimavaa.
Nalunaarusiaq suleqatigiit, Interfolk, Institut for Civilsamfund, DFKS - Det Frivillige kulturelle Samråd, NUKAKA – De Grønlandske Museers Sammenslutning aamma Torshavns Aften-, Ungdoms- og Sprog Skole peqatigalugit suliaavoq.
Kalaallit Nunaanni peqatigiiffiit Savalimmiuni Danmarkimilu peqatigiiffinnik assingusunik annertuumik suleqateqanngitsut misissuinerup takutippaa. Naalagaaffeqatigiit akornanni ilinniartitaanermut tunngatillugu suleqatigiittoqanngilaq.
Kalaallit Nunaata, Savalimmiut Danmarkillu akornanni peqatigiiffiit suliassaqarfiit ilaanni suleqatigiissuteqartut, naggataarutaasumik oqaaseqaammi allaqqavoq:
- Kulturikkulli suliniuteqarnermi Kalaallit Atuakkiortut Peqatigiiffiat Savalimmiunik Danmarkimillu suleqateqarluarpoq. Isumaginninnikkut annertuumik suleqateqartoqarpasippoq, pingaartumik kalaallit qallunaallu peqatigiiffiisa akornanni. Aamma avatangiisinut tunngasunut tunngatillugu kalaallit qallunaallu peqatigiiffii annertuumik suleqatigiipput, nalunaarummi allassimavoq.
Kalaallit Nunaannit isigalugu nunami maani peqatigiiffiit Savalimmiuni Danmarkimilu peqatigiiffiit tamarmik iluaqutigisinnaasaannik suleqatigiilluarsinnaapput, Nordplus isumaqarpoq.