Nalunaarusiaq: Meeqqat angerlarsimaffiup avataanut inissinneqarsimasut tarnimikkut ilungersuuteqartunik angajoqqaaqakkajupput

Anaanat kalaallit affaat, ataatallu pingasuugaangata ataaseq meeqqaminnik arsaagaasimasut tarnimikkut nappaateqartutut nalilerneqarnikuusimasarput. Meeqqat amerlanerpaartaat angajoqqaarsianut inissinneqartarput.

Meeqqat kalaallinit kingoqqisut Danmarkimi najugaqartut 100-juugaangata arfinilingajaat angerlarsimaffiup avataanut inissinneqarsimasarput. Meeqqat qallunaani 100-juugaangata ataaseq angerlarsimaffiup avataanut inissinneqarsimasarpoq.

VIVE-p nalunaarusiaani ”Børn med grønlandsk baggrund, der er anbragt i Danmark – fra danske kommuner”-ni ullumi saqqummersinneqartumi atuarneqarsinnaavoq.

Paasissutissat apersuinerillu aallaavigalugit nalunaarusiaq suliarineqarsimavoq. Meeqqat kalaallinik angajoqqaaqartut 396-it angerlarsimaffiup avataanut inissinneqarsimasut misissuinermi peqataatinneqarput.

Angajoqqaat tunuliaqutaat

DR-p radiokkut aallakaatitsivia P1 Morgen sapaatip akunnerata siuliani arlalinnik ilanngutassiaqarpoq angajoqqaat kalaallit danskit sullisseriaasiannik misigisaqartillutik unammillernartunik arlalinnik nalaataqartartut. Meeqqat angerlarsimaffiup avataanut inissinneqarnissaannut tunngatillugu, oqaatsitigut kulturikkullu assigiinngitsuuneq pissutigalugu angajoqqaat piginnaasaannik nalilersueriaaseq naleqqussarneqarsimanngitsoq atorlugu nalilersuisoqartarnera ilisimatuut arlallit apeqquserpaat.

VVE-lli nalunaarusiamini kalaallit qallunaallu angajoqqaat assigeequteqarsinnaaneri nalunaarusiami aamma tikkuarpai.

- Meeqqat kalaallinik angajoqqaallit angerlarsimaffiup avataanut inissinneqarsimasut angajoqqaarsianut inissinneqarsimasuusarput. Angajoqqaat inuunerminni inissisimanerat arsaagaanermut tunngaviukkajunnerusarnera pissutaavoq, VIVE tusagassiorfinnut nalunaaruteqarluni allappoq.

Kisitsisit takutippaat qallunaat kalaallillu angajoqqaat meeqqaminnik arsaagaasimasuni, anaanaasut affaata missaat ataataasullu pingasuugaangata ataaseq tarnimikkut nappaateqartutut paasisimaneqartartut. Kiisalu anaanaasuni tallimaagaangata ataaseq ataataasullu affangajaat inuunerminni pinerlunnikuusimasartut, suminngaanneersuuneq apeqqutaatinnagu.

Meeqqat arsaarinnissutigineqarsimasut ajunngitsumik inuusut

Angajoqqaat kalaallit Danmarkimi najugaqartut akornanni inuuniarnermikkut ilungersunartorsiortoqarneruvoq, qallunaat angajoqqaajusunut sanilliullugit.

Apersuinertaqartumik misissuinermi VIVE-p paasivaa danskit kommuniisa qatanngutigiit ataatsimoortillugit inissinniarnissaannik sulissuteqakkajunnerusartut, angajoqqaallu qanittuannut inissiinissamut sulissuteqakkajunnerusartut. Meeqqalli oqaatsiminik annaasaqannginnissaa suliniutini salliutinneqarneq ajortoq.

- Angerlarsimaffiup avataanut inissiinissami meeqqat qatanngutigiittut angajoqqaallu qanittuani inissinneqarnissaanut kommunit sulissuteqartarput, oqaatsilli pigiinnarnissaanut periarfissat tunulliunneqartarput, VIVE misissuisartoq Karen Margrethe Dahl nassuiaavoq.

Powered by Labrador CMS